Misyon sa kasingkasing

Maoy headline sa mga balita sa radyo, pamantalaan ug telebisyon nianang adlawa ang nahitabong panag-engkuwentro tali sa mga sakop sa kapolisan ug sa mga smuggler nga nahitabo sa usa ka baybayon sa lungsod sa Argao sa miaging gabii.

Nakaabot sa kasayoran nila ni Bradley ug Sandra ang maong balita. Nakapalit si Bradley og pamantalaan sa iyang paglugsong sa kinapusoran sa lungsod sa Alcoy kaganina ug iya kining gidala sa iyang pagbalik ngadto sa balay nga giistaran nila ni Sandra sa barangay Nug-as.

Sumala sa balita, napatay sa kapolisan ang tanang mga smuggler ug ingon man ang mga police scalawags nga mi-back-up kanila. Usa sa napatay sa kapolisan nga gipangulohan ni Col. Cesar Antipon mao si Morris Sta. Ana nga nadiskubrehang usa diay ka sakop sa Molimoli Gang.

Nadakpang buhi nila ni Col. Antipon si Col. Ver Rivera ug misuka kini sa tanang tinagoan sa Molimoli Gang. Mitug-an si Col. Rivera nga si Cong. Octavio Sta. Ana mao ang lider sa Molimoli Gang ug bisan unsang orasa mahimong dakpon ang maong kongresista sa higayon nga malutsan na kini og warrant of arrest.

“Nagtuo kong nasulbad na ang kaso sa kamatayon sa akong uyoan nga si Rafael Castro,” nagkanayon si Bradley.

“Nganong nakasulti ka man niana?” Sukit ni Sandra.

“Maoy teyoriya sa mga imbestigador didto sa Cagayan de Oro nga posibleng giunay ra’g patay sa iyang mga kauban ang akong uyoan tungod kay gusto na kining mobuwag sa sindikato. Mao nga niining pagkapuhag karon sa Molimoli Gang, nasulbad na usab ang kaso sa kamatayon sa akong uyoan.” -- Sumpayan pa