Ungo ang pasyente ni Dr. Gualberto

Midalidali dayon og duol si Nayong kang Doktor Gualberto dihang misulod sa klinika sa doktor si Anastacio, ang anak ni anhing Mascardo nga gidungogdungog kaniadto dinhi sa ilang lungsod nga usa ka mangtas nga ungo.

Daghan na kuno kaayong gibalbal kadtong amahan ni Anastacio. Usa sa gibugno niini nga hangtod karon kay lagi tiguwang na man sad intawon, si Noy Atong, nga magkanguhal og sugilon sa gibuhat kaniya ni anhing Mascardo nga gibugno siya ug diriyot siya mamatay.

Klaro gyud sa iyang mga mata bisa’g ngitngit na ang ilawom sa dakong punoan sa akasya kay tagidyot ra man ang dan-ag sa buwan nga bag-o pang misubang kay nasalipdan sa mga dahon sa akasya nga si Mascardo gyud ug maayo lang gani kay may nakaagi nga silingan ra pud nila ug natabangan si Noy Atong ug ang mangtas kadali ra kaayong nakalukso ug kalit lang nahanaw.

Ug karon gibati og hilabihang kakulba si Nayong kay lagi suheto man siya sa kaliwat nila ni Anastacio. Karon ning iyang pagduol kang Doktor Gualberto way lipodlipod nga iyang gisultihan ang Doktor. Igo lang mipahiyom ang Doktor human sultii ni Nayong bahin kang Anastacio.

“Kining akong propesyon, Nayong, way gipili,” miigham og gamay ang doktor nga mipasiplat og tan-aw kang Nayong. “Kun ungo man kana si Anastacio, segun sa imong gisulti, wa koy mahimo, Nayong, kay basin og nasakit kana siya ug nia siya karon dinhi sa akong klinika aron magpa-check-up...”

“Sa ato pa, di ka mahadlok og ungo, Doktor?” ni Nayong pa mitutok kang Doktor Gualberto.

“Wala pa man gud ko kakita og ungo, Nayong, sukad-masukad sa akong pagkabata ug hangtod karon nga usa na ako ka doktor...”

“Mao ba, Dok, pero, ang ako lang ikasulti nimo, ayaw og kompiyansa, ayaw lang gyud,” ug migawas dayon si Nayong sa lawak-buhatan ni Doktor Gualberto.

Siya man gud ang janitor dinhi sa klinika ni Doktor Gualberto ug dugay na usab siya sa maong trabaho.

Unya iyang nakita si Anastacio nga naglingkod tupad sa mga pipila ka pasyente dinhi sa sulod sa klinika. Ug mao kadto ang sinugdanan nga kanunay nang magpatambal si Anastacio kang Doktor Gualberto. Unya usa ka hapon dihang manira na ang klinika ni Doktor Gualberto, kalit lang mibutho si Anastacio nga nagkadugo ug ingon sa grabe gyud ang naangkon nga samad niini dapit sa kilid.

“Doktor, Dok, tambali ko, kay gidunggab ko,” niini pa nga luspad na kaayo. Naluoy si Doktor Gualberto ug iya dayon kining giatiman ug maayo gani kay kompleto pud sa mga tambal ug mga gamit si Doktor Gualberto alang sa operasyon sa samad. Nagpasalamat si Anastacio.

“Di gyud nako kalimtan ang imong pagtabang nako, Dok,” ni Anastacio pa. “Sige lang, may adlaw ra nga makabawos ko sa imong kaayo nako...”

Unya usa ka gabii, samtang nag-inusara si Doktor Gualberto sa iyang klinika, may mga tulo ka armadong tawo nga kalit lang misulod nga matud pa sa usa niini, holdap ang ilang tuyo ug kuwarta lang ang kuhaon kang Doktor Gualberto apan nagdumili ang Doktor. Nagmagahi siya sa paghatag sa tuyo sa mga tulisan ug tungod niini nakahukom ang usa ka tulisan nga pusilon si Doktor Gualberto.

Apan sa wa pa mabuhat sa tulisan ang pagpatay sa doktor, may mitumaw nga mangtas nga ungo ug gipangbugno ang tulo ka tulisan. Naglumba’g panagan ang tulo nga nakaangkon og daghang mga samad. Sa tan-aw ni Doktor Gualberto sa mangtas mora’g kamay-ong ni Anastacio ug dayon milupad kini ug kadali rang nahanaw sa panan-aw sa doktor. (Kataposan)