Gula 15
Bahala na. Nakaingon ko sa hilom. Dili gyud nako tubagon ang mga text ug tawag ni Homer. Kun paundayonan ko siya sa gusto niyang mahitabo, posibleng masubli sa makadaghan ang kinawat-kawat namong panagtagbo ug mabuking kami sa kadugayan ngadto sa katawhan.
Pagka-Domingo, nisimba ko. Gusto kong mangayog pasaylo ngadto sa Ginoo sa nahimo kong kasal-anan-- sa akong pagpadaog sa tentasyon sa unod nga maoy hinungdan nga may nahitabo na tali namo ni Homer.
Paggawas nako sa simbahan human sa misa, nakahukom kong maglakaw lang pauli sa balay. Dihay motorsiklo nga kalit mihunong sa akong tungod. Kalit kong gikulbaan pagkakita sa nagsakay sa motorsiklo. Si Homer!
Nakugang ko pagkakita ni Homer. Nasayod ko’g unsay iyang tuyo nako. Nakaseguro kong iya kong sukmatan nganong wala ko mo-reply sa iyang mga text sa nakalabay nga adlaw’ng Biyernes.
“Mahimo bang magsulti ta?” Nagkanayon si Homer nga wala lang mokanaog gikan sa iyang motorsiklo.
“Nga-ngano man?” Misumbalik ko’g pangutana.
“May mahinungdanon kong tuyo nimo.”
Milingi-lingi ko. Unya misanong ko sa gihangyo ni Homer. Sa usa ka waiting shed nga nahimutang sa usa ka eskina, didto mi nagsultihanay. -- Sumpayan pa