Misyon sa kasingkasing

Gula 80

Nasuta nila ni Col. Antipon nga armado ang mga tawo nga nahiabot. Tungod kay buwanon man, nakita pag-ayo nila ni Col. Antipon ang maong mga tawo nga didto na sa daplin sa baybayon. Wala hinuon nila maklaro ang panagway sa maong mga tawo.

“Bugo ning mga tawhana,” gihunghungan ni Col. Antipon si SPO1 Angbetic nga maoy labing duol sa iyang gitagoan. “Giatol gyud nila ang shipment sa panahon nga buwanon nga dali ra silang makit-an.”

“Nagkompiyansa sila, Sir,” ni SPO1 Angbetic. “Nagtuo nga way laing makatiktik sa ilang operasyon.”

“Mao gyud.”

Alas onse imedya. Nakadunggo na ang sakyanan sa kadagatan nga gikargahan sa smuggled nga mga armas. Gidiskarga dayon kini ngadto sa baybayon ug gikarga’g balhin ngadto sa naghulat nga container van.

Nasuta ni Col. Antipon nga mao na kini ang tukmang panahon sa ilang paglihok. Gipapangandam niya ang iyang mga sakop ug ingon man ang mga sakop sa kapolisan sa lungsod sa Argao.

“Atensiyon,” milanog ang tingog ni Col. Antipon sa megaphone. “Si Col. Antipon kini. Gilibotan na namo ang inyong nahimutangan. Ampo kamong malinawon aron kalikayan ang pagbanaw sa daghang dugo.”

Tungod lagi kay hayag kaayo ang buwan, nakita nila ni Col. Antipon nga ingon sa natarantar ang mga tawong armado. Mora’g wala gayod magdahom ang maong mga tawo nga mahiabot ang grupo ni Col. Antipon sa dapit diin gidunggo ang shipment sa smuggled nga mga armas. -- Sumpayan pa