Ang Impiyerno ni Belen - 2

Gula 14

Sa makadiyot naghinuktok ko. Makigkita ba ko ni Homer o dili? Kini ang gipangutana ko sa akong kaugalingon.

Misantop sa akong hunahuna kun unsay balidong rason nga akong ipatuo sa akong mga ginikanan nganong moadto ko sa Tagbilaran. Wala man koy lehitimong tuyo didto sa siyudad.

Nabalaka ko nga kun mamakak ko o maghimog alibi, tingalig magduda ang akong mga ginikanan nga lain ang akong tuyo didto sa Tagbilaran. Dili ko gustong magbaton sila’g katahap nako.

Naglisod ko paghukom. Wala na lang nako tubaga ang text ni Homer kay maglisod sab ko pagbalibad niya. Wala ko masayod kun unsaon ko siya pagpasabot kun nganong dili ko makahimo pagpakigkita niya didto sa Tagbilaran segun sa iyang gusto.

Kaha nahibulong nganong wala ko mo-reply sa iyang text, si Homer mi-text pag-usab nako. Mao ra gihapon ang mensahe. Gusto siyang makigkita nako didto sa Tagbilaran. (Nasayod kos iyang tuyo).

Wala gihapon ko mo-reply sa text ni Homer. Mas maayo pang dili ko mo-reply aron dili na siya manguti-kuti. Pero nagpusot-pusot na hinuon ang text ni Homer nako. Nag-miss call pa gyud siya. -- Sumpayan pa