Ang Impiyerno ni Belen - 2

Gula 13

Kadali rang nakasul-ob si Homer sa iyang mga sapot. Pagkahuman, migawas na siya sa balay ug mipaingon sa nahimutangan sa iyang motorsiklo. Misakay dayon siya sa motorsiklo ug mipadagan niini palayo sa balay.

Dihang nakabiya na si Homer, mibalik ko’g sulod sa akong lawak. Mihigda ko nga ang mga mata gitutok sa kisame. Ang akong gihunahuna mao ang nahitabo tali namo ni Homer dili pa lang dugay.

Kun nagpugong pa lang ko sa akong kaulag, wala untay nahitabo tali namo ni Homer. Apan midaog ang akong kahuyang. Gipanglimotan ko ug daw nawad-an sa hustong panghunahuna. Mipatigbabaw ang awhag sa unod. Ug nagmadaogon ang tentasyon.

Unya mibati ko’g kabalaka dihang misantop sa akong hunahuna nga karong nasugdan ko na ang pagbalik sa kanhi kong bisyo, tingalig dili na sab ko makalikay sa dugang pang mga tentasyon nga moabot sa akong kinabuhi.

Biyernes sa hapon. Samtang nanglimpiyo ko sulod sa balay, mitingog ang message alert tone sa akong cellphone nga gipatong sa lamesita sa may sala. Akong gisusi kun kinsay nag-text. Si Homer diay.

“Magkita ta ugma sa Tagbilaran. Magpaabot ko nimo sa Breadbasket sulod sa BQ Mall,” maoy unod sa text ni Homer. -- Sumpayan pa