Labtingaw

Sa among panihapon, napanid-an ko si Papa Mariano nga nagtimitimi sa pagkaon niya sa lamaylamay nga utan nga giandam kaniya ni Mama Lita. Binuyok man unta nga kan-ong mais ang gilung-ag ni Mama nga maoy ampay sa mag-uuma kong amahan. Apan nagmug-ot karon si Papa. Wa gyud siya’y gana nga mikaon. Unya, mialam-alam kaniya si Mama.

"Mar, sabta lang gud ko! Unsaon man nga nahutdan man og labtingaw nga bulad sila si Rey ug Daylin...!" padayon nga alam-alam sa akong inahan sa nagmug-ot kong amahan sa talad kan-anan. "Mao nga mawos ginamos na lang ang akong gipalit, Mar....!"

Nagpanglingo gayud si Papa. Karon nasabtan ko na diay nganong way gana ang iyang pagkaon sa among panihapon.

"Bisag si Junior na lang unta ang imong gisugo sa tiyanggihan kaganiha sa pag-abot niya gikan sa eskuylahan!" mipasiklap nako si Papa. "Nagtugon na baya ko nimo sa dayon nakong adto sa atong uma, nga palit gyud og labtingaw sa tiyanggihan, kay mao na ang kinaham kong isula sa lamaylamay nga utan....!" may pagmahay gyud ang sinultihan ni Papa Mar.

"Na hala, ugma’s buntag na lang ko mosayog palit og buwad labtingaw sa tiyanggihan. Agwantaha lang una kanang mawos ginamos! Bahog na...!

Nakapanglingo ko sa hilom. Pastilan sab kini si Papa, uy! Basta wa gani ang labtingaw nga bulad, magtimitimi gyud ni sa pagkaon sa binuyok nga kan-on ug lamaylamay nga utan. Ambot ba sab ni Papa, uy. Ganahan man gyud siya sa labtingaw. Kana bang bulad nga isda nga naalang-alang sa pagkauga. Lud-on ko’s baho, uy! Apan ganahan gyud si Papa Mar sa baho sa labtingaw.

Kugihan si Papa Mar sa pagtikad sa among uma. Unya, kugihan sab kaayo si Mama Lita sa mga buluhaton sa panimalay, magdigamo sa among pamahaw, paniudto ug panihapon. Basta sa matag kaon ni papa, anaa gyud ang bulad nga labtingaw. Gipangita niya kanunay ang baho ning maong matang sa bulad. Sanglit bugtong kong anak kay wa pa gyud kasundi ug kamanghori, pinangga gyud ko nila ni Papa ug Mama, nga sa edad nga otso, anaa na sa ikaduhang ang-ang sa primarya.

Ning gabhiona, miiknat ang akong kilay nga naghigda sa akong kuwarto (duha ra ang kuwarto sa among balay), dihang nadungog ko ang panagsulti nila ni Mama ug Papa.

"Unsa ka ba, Mar, uy! Wa kay kondisyon, unya sige man og panghinol....!"

"Ayaw'g palag gud, Lit! Gihidlaw baya ko’s labtingaw....!"

"Ugma pa lagi ta palit og labtingaw! Si Dong Junior lay akong sugoon...!"

"Unsay ugma pa? Ba diha, naa ra man lagi ning labtingaw...!"

Mitimbakuwas ko sa paghigda. Nakuryuso ko’s akong nadungog gikan kang Papa. Milili ko sa lihang nga bungbong sa amakan, lahos sa kuwarto nilang Papa ug Mama.

Ngeee! Kalain gud nila ni Papa Mar ug Mama Lita. Parehas nga hubo na ang ilang mga lawas. Ug si Papa didto nagtapuko sa bilahan ni Mama. Morag ang butakal namong baboy si papa. Asa man kaha ang giingon ni Papa nga labtingaw? Galibog ko, uy. (Kataposan)