Ang Impiyerno ni Belen - 2

Gula 6

Gipalong ko ang TV nga maoy akong gipasalidahan sa DVD. Nakahukom kong mamati na lang og music pinaagi sa component. Nangutingkay ko’g mga CD sa CD rack. Namili ko’g nindot nga mga kanta. Nautingkayan ko ang mga collection sa mga kanta nila ni Barry Manilow, Celine Dion, Air Supply, The Carpenters, Cascades, Michael Learns To Rock, Britney Spears, Eagles, Westlife, Jim Brachman ug daghan pang uban.

Maoy akong gipatugtog ang mga kanta ni Shania Twain. Pero wala gihapon ko malingaw. Ang akong hunahuna didto ra sa x-rated film nga akong natan-awan. Naglagot ko sa hilom sa akong kaugalingon kay dili man gyud kini malaksi sa akong panumdoman.

Mipaso-paso ko sa hawanan sa sala aron paghatag og relief sa akong kaugalingon. Apan daw nagsalimuang na hinuon ang akong hunahuna. Hangtod nga misantop sa akong hunahuna si Homer. Gikuha ko ang akong cellphone ug mi-text ko kaniya.

Ang mensahe sa akong text ngadto ni Homer nag-ingon nga gusto kong makigsulti niya ug magpaabot ko niya sa balay. Mi-reply dayon si Homer sa akong text, nag-ingon nga in ten minutes moabot na siya.

Tuod man, nagpaabot ko. Ug...wala pa gani ten minutes, may motorsiklo nga mihunong sa tungod sa balay. Sa akong paglili sa may bentana, si Homer ang akong nakita nga maoy pagkanaog sa motorsiklo. -- Sumpayan pa