Misyon sa kasingkasing

Gula 71

Midali si Bradley paghaw-as gikan sa tubig sa busay. Nagpadayon pa gihapon ang pagtawag ni Sandra sa iyang ngalan. Nasabot niya nga nangita kini kaniya.

“Sandra, dia ra ko!” Gisinggitan niya si Sandra dihang iya kining nakita nga daw sa nahasirilsiril sa pagpangita kaniya.

Pagkakita ni Sandra kaniya, midagan kini paingon sa iyang nahimutangan. Ug nakalitan si Bradley dihang midiretso kini paggakos kaniya. Nakabantay si Bradley nga may mga luha ang mga mata sa dalaga.

“Unsa bay nahitabo nimo?” Nakapangutana si Bradley.

“Gipakaingon ko’g imo na kong gibiyaan,” ni Sandra nga mihingoshingos.

“Mahitabo ba gud na? Naligo lang ko sa busay. Wa ko lang tugawa ang imong pagkatulog kaganina kay nahinanok ka pa man sa akong paggikan. Dili mahitabong biyaan ko ikaw tungod kay nakahukom kong tabangan ug unongan ko ikaw bisan unsa pay mahitabo.”

Inanay nga milurang ang paghingoshingos ni Sandra. Ug dihang mibalik na sa normal ang emosyon sa dalaga, nagkuyog sila si Bradley sa pagpamauli ngadto sa balay.

Human sa pamahaw mitungas si Bradley sa bungtod nga unahan lang og diyotay sa balay nga ilang gipuy-an. Si Sandra nagpabilin lang sa balay. Ingon sa nadutlan na ang dalaga sa iyang pasalig nga dili kini niya biyaan mao nga mikompiyansa na kini kaniya. -- Sumpayan pa