Gula 70
“Dobleha ang inyong paningkamot, Col. Rivera,” ni Morris pa. “Kinahanglang makuha nako pagbalik si Sandra sa labing daling panahon.”
“Ayaw kabalaka, Mr. Sta. Ana,” pasalig ni Col. Rivera. “Karon nga usa na ka pinangita sa balaod si SPO1 Bradley Mangubat, nakaseguro kong dili magdugay ang ilang pagtago-tago. Nakig-coordinate na kami sa kapolisan sa kalungsoran. Gipalihok ko na usab ang akong mga asset.”
“Maayo hinuon kun mao kana. Kinahanglang makuha gayod nako pagbalik si Sandra kay tingali’g unsay mahitabo kaniya sa mga kamot ni SPO1 Mangubat.”
“Relaks lang, Mr. Sta. Ana. Sa gikaingon ko na, dili magdugay ang pagtago-tago nila ni SPO1 Mangubat ug sa imong pangasaw-onon.”
Wala pa mahigmata si Sandra sa pagbiya ni Bradley sa balay. Miadto siya sa busay aron maligo. Gipasagdan lang niya si Sandra nga natulog pa. Misantop sa iyang hunahuna nga tingali inigbalik unya niya gikan sa busay, magmata na ang dalaga.
Ang busay nahimutang sa ubos nga bahin sa nahitarokan sa balay nga ilang giistaran. May igo kining gilay-on gikan sa balay. Suheto siya sa maong dapit tungod kay magkanunayan siya dinhi niadtong bata pa siya.
Nagmingaw ang busay sa iyang paghiabot. Gihukas dayon niya ang iyang sinina ug milusbog sa pagtugsaw sa tubig nga tin-aw kaayo. Ang kabugnaw sa tubig daw nanuhotsuhot sa iyang kalawasan. Nagtagbaw gayod siya sa pagkaligo.
Hapit na si Bradley mahuman sa pagkaligo sa dihang may nabati siyang tingog sa usa ka babaye. Tingog ni Sandra nga nagpanawag sa iyang ngalan. -- Sumpayan pa