Sakit man, apan angay buhaton

Nakahurot na ko'g usa ka basong juice sa sulod sa usa ka snack bar dihang nahiabot si Joel. Milingkod siya sa akong atbang. Mikupot dayon siya sa akong kamot. Subo kaayo siya. Nasayod siya kun unsa ang akong tuyo kaniya karon, kun nganong nakigkita ko kaniya. "Kinahanglang mahitabo ba gyud kini, Luz?" "Nakonsensiya na ko, Joel." Gipahiran ko sa gikuptan kong panyo ang akong mga luha. "Enough is enough. Dugay nang nangandoy og anak si Liza. Malipay na siya nga duna na moy anak."

"Modayon ka ba gyud sa pagpalayo?"

"Oo, Joel. Andam na ang akong mga papeles sa pagtrabaho sa Kuwait isip usa ka nars sa usa ka ospital didto." Gilig-on ko ang akong kaugalingon. "Sige na. Kuhaa na sa gipuy-an kong apartment ang atong anak. Gitugon ko na ang yaya bahin sa imong pagkuha sa bata. Gituyo ko kini kay di ko makaako nga magtan-aw sa bata nga mahilayo na kanako."

"Is this goodbye, Luz?"

"Yes, Joel. This is goodbye!"

"Don't worry, Joel, di ko kamo samukon. Di ko gukdon ang bata. Gihatag ko na nimo ang hingpit nga katungod sa pag-angkon sa atong anak. Gawas pa, imong apelyido ang gidala sa atong anak."

Mitindog si Joel. Gisundan ko siya sa pagtan-aw. Wa ko mogawas sa snack bar. Gipaabot ko si Liza. After thirty minutes, nahiabot siya.

"Pasayloa ko, Liza. Nakigrelasyon ko sa imong bana."

"Way gitago si Joel nako, Luz."

"N-Nasayod ka diay niini?" Wa koy nakitang kasuko sa nawong ni Liza.

"Oo. Pero gisabot ko siya kay di ko makahatag kaniya'g anak, may depekto ang akong matres. Gawas pa, ikaw ang tinuod niyang girlfriend. Gikorner ko siya aron magpakasal kanako. Pasayloa ko nga gitental ko si Joel."

"Kalimtan na nato ang nangagi, Liza. Maoy atong atubangon ang karon. Kini ang rason nga nakigkita ko karon nimo."

Gisulti ko kang Liza ang nakab-ot kong hukom. Ang tanan gayod.

"Tinuod, Luz?"

Usa ka tinuod nga kalipay ang nakita ko sa nawong ni Liza.

"Oo,Liz. Mahala ang bata." "Isaad ko, Luz, nga isipon kong tinuod nga anak ang anak ninyo ni Joel. Panggaon ko siya."

"Salamat, Liz. Malipayon ko nga mobiya sa atong nasud.

Dihang nakabiya na si Liza, naitlib ko ang ubos kong wait. Bisag may luha ang akong mga mata pero miluag ang akong dughan. Morag dihay daghang mga tunok nga nangaibot.

Nakaamgo na ko sa dakong sala nga akong nahimo, sa pagpakigrelasyon ko sa lalaking minyo. Apan sa laing bahin, nakahatag usab ko og kalipay sa iyang asawa nga nabuhatan ko sa maong sala.

Gibati ko ang kagaan sa akong pagbati nga mibiya sa snack bar, ang dapit nga suki namong abotanan ni Joel.

Midiretso ko sa paglakaw. Di ko gustong lingion pa ang maong dapit. Gusto ko na kining kalimtan sa hingpit. (Kataposan)