Ang anananggal ug ang iring itom

Nay, nay Soling, wa ka kahibawo sa mga tabitabi dinhi sa ato? ni Pikto pa nga miduol sa iyang inahan kinsa libang kaayo nga nagharos sa kamunggay nga maoy ilang utanon karon.

 “O, kay unsa man diay ang mga tabitabi dinhi sa ato, ha, Pikto?” mitan-aw si Nang Isyang sa iyang anak.

“Na-ungo na kuno kana sila si Noy Bagdot ug si Nang Guada,” daling tubag ni Pikto.

“Ayaw pataka’g yawit anang imong baba, uy, Pikto. Unsa guy naungo nga puwerte mang Diosnona anang magtiayona. Kada Domingo manimba man na silang duha,” mora’g misupak si Nang Isyang sa gitaho sa iyang anak.

“Mao lagi, Nay, dili lagi na sila ungo si Noy Bagdot ug si Nang Guada, pero, matud pa, gipatakdan kuno kana sila didto sa Pingganpinggan dihang namista sila didto,” pasabot ni Pikto. Kini si Pikto graduwado sa kursong Marine Engineering ug nagpaabot na lang siya sa tawag sa kompaniya nga iyang giaplayan. Ug samtang nagpaabot, kay lagi laay man sad kun naa ka pirme sa balay, mao nalingaw sa iyang mga barkada nga mga silingan ra pud nila ug diha kanila siya makakuha sa maong tabitabi.

“Binuang,” mora’g dili gihapon motuo ang iyang Nanay Isyang.

“Adtong usang gabii, Nay, may nakakita nga nagpakaon si Nang Guada sa buhi nilang mga sigbin,” ni Pikto pa. “Ug pagka-taudtaod wala na motingog ang iyang Nanay Isyang. Nagpadayon kini sa pagharos sa dahon sa kamunggay.

Unya, niang pagka-gabii gisuwayan ni Pikto pagpaniid ang balay ug palibot sa balay nilang Nang Guada ug Noy Bagdot. Halawom nang gabii ug nangatulog na ang tibuok balangay.

Taudtaod dihay babaye nga nanaog ug nanabod, ambot kun unsay gipangsabod, kay mao man lay nakita ni Pikto nga nanuol ang mga sigbin ug nangaon sa gipangsabod nga pagkaon. Ug wala dangtig dugay milakaw si Nang Guada sa ilawom sa punoan sa Chicos ug unya nakita gyud ni Pikto nga nahimo kining usa ka anananggal ug dayon milupad.

Sa sunod nga mga gutling nakita ni Pikto si Noy Bagdot nga nanaog ug diha pa gani sa may hagdanan nahimo na kining usa ka iring itom. Dinhi gibati og tumang kahadlok si Pikto ug mituo na siya sa mga tabitabi nga ang ilang silingan nahimo nang mga ungo. Ug kay may dala man siyang punyal nga gama sa boronse mihinay siya’g lakaw paingon sa ilaha.

Apan diha pa gani siya sa may agianan paingon sa ila, gisugat siya’g usa ka iring itom apan wala siya hilabti kay mora’g milikay man kini kaniya ug midalig dagan sum-ok sa kakugnan.

“Ngiyawwwwww!!! Ngiyawwww!!!” matud pa niini nga kalit lang nahilom. Unya misunod ang tingog sa wakwak ug sa pagyanghag pa ni Pikto maoy iyang nakita ang usa ka anananggal nga naglupad nga nag-urong paatbang kaniya ug wala siya hilabti kay milupad man kini paingon sa ilawom sa kalubihan.

Sa iyang kahadlok, misutoy siya’g dagan ug iyang gisugid ang nasaksihan niya kagabii nga wala siya hilabti sa mga abat nga anananggal ug iring itom.

“Ingon ana gyud na, Pikto, ang mga ungo dili gyud mangunay og mga silingan,” hinay nga namulong si Nang Isyang. “Oo, sila kadto si Mare Guada ug Pare Bagdot nga nahimo nang mga ungo kay gipatakdan didto sa balangay sa Pingganpinggan nga nabaniog nga dunay daghang ungo....” ug nanghuy-ab si Nang Isyang kay katugon na. (Kataposan)