Gula 73
Gipasulod ni Sonia ang iyang sakyanan sa garahe ug pagkahuman iya nang gi-entertain si Roy sa sala.
“Wa ka ba masuko nako?” Nangutana si Roy.
“Nganong masuko man kuno ko nimo?” Misumbalik pagpangutana si Sonia.
“Tungod sa akong pagpangulitawo nimo,” matud ni Roy. “Basin nagtuo ka nga nag-take advantage lang ko. Nakadungog ra ba ko’g estorya nga...”
“Nga unsa?”
“Nga man hater kuno ka.”
Mipahiyom si Sonia. “Kaniadto ra to. Karon dili na ko man hater. Daghan ko’g nakat-onan nga leksiyon sa nangaging mga panghitabo sa akong kinabuhi. Nakaamgo ko nga ang kasilag dili gayod angay amomahon sa balatian.”
Wala motingog si Roy. Nagpakahilom usab si Sonia.
“M-may paglaom ba ang akong gugma?” Misukna si Roy pagkilab sa pipila ka daklit.
“Kabalibaran ko kaha ang tawo nga maoy nagluwas sa akong kinabuhi?”
“Pero dili ko gusto nga makigrelasyon ka lang nako tungod sa imong pagtan-aw og utang kabubut-on. Ang gusto ko mao nga higugmaon mo ako.”
“Wa ko maghunahuna nga nakautang ko’g kabubut-on kanimo, Roy. Hinuon, akong gihunahuna kun...”
“Kun unsa?”
“Kun motuo ka ba kaha nga nahigugma na sab ko nimo.”
Sa nadungog ni Roy, nagakos niya si Sonia. Mao na lamang usay namatngonan ni Sonia nga migakos na usab siya kang Roy. (Kataposan)