Gula 64
Nasagmuyo pag-ayo si Bradley. Wala siya magdahom nga mao kini ang mahitabo kaniya. Siya nga igo lang mitabang kang Sandra Diolan mao na hinuon ang napasanginlan nga maoy nagdagit niini? Pagkadakong binuang! Gisukip pa ra ba gayod uban sa balita ang iyang hulagway ug ingon man ang hulagway ni Sandra.
Wala na ipabasa ni Bradley ang maong balita ngadto kang Sandra. Gihipos niya ang pamantalaan. Nabalaka nga tingalig may makaila, nagduko lang si Bradley sa iyang gilingkoran. Iya sab giingnan si Sandra nga moduko ug magpasumangil nga natulog.
Mihunas og diyotay ang kabalaka ni Bradley dihang milarga na ang bus nga ilang gisakyan.
Pag-abot nila sa lungsod sa Alcoy, namalit una’g mga gamit sila si Sandra ug Bradley. Maayo gani kay bag-ong naka-withdraw si Bradley sa iyang ATM mao nga nakadala siya’g dako-dakong kantidad sa kuwarta.
Namalit sila’g mga pagkaon nga delata, tinapay, bugas ug uban pa. Namalit usab sila og mga sapot sanglit tapot-lawas ra man sila nga nahiabot sa Alcoy.
Human makapamalit, nagpahatod na sila’g habal-habal paingon ngadto sa barangay Nug-as nga nahimutang sa bukirang bahin sa lungsod sa Alcoy. Gikan sa karsada diin didto ra sila kutob gihatod sa habal-habal, mibaktas pa sila’g kapin sa tunga sa kilometro una pa sila mahiabot sa dapit nga maoy gipuy-an sa mga kabanay ni Bradley. -- Sumpayan pa