Mapait ang kinabuhi sa Saudi

Kun si Sandro ang pagbut-on, dili gayod siya manarbaho didto sa Saudi Arabia. Daghan na ang mga sugilanon nga naghisgot kun unsa kapait puy-an kini nga nasora. Apan ang iyang asawa, mao usab ang disidido nga molangyaw siya didto kay aron kuno nga tua ako didto, makatukod kami’g balay.

"Kun nia ka lang sa Pilipinas, walay mahitabo sa atong kinabuhi," pulong sa iyang asawa nga si Geva. "Apan kun mahatagan ka’g higayon nga maka-abroad ka, basin nga makaangat ang atong pagpuyo."

"Ambot lang kaninyo. Kun ako ang magbuot, dili gayod ako mo-abroad," tubag ni Sandro. "Bisan asa basta palaron ang tawo, molambo siya."

"Apan, maayo gayod kadtong maka-abroad kay makakita kapa’g laing lugar gawas sa Pilipinas. Kun maka-abroad ka, makakita ka’g dagkong eroplano nga naa ra sa magasin imong makita," matud sa iyang amahan. "Busa, gamita ang imong utok isip usa ka welder."

Busa, tungod sa sugyot sa iyang asawa ug sa iyang amahan, miaplay si Sandro og trabaho sa Saudi. Gilimtan niya ang mga sugilanon mahitungod sa kapait puy-an ang Saudi. Ug tungod kay matawag siya nga dunay kahibalo, gidawat hangtod nga human mahikay ang iyang mga papeles, gitakda ang iyang paglarga. Mga luha sa iyang asawa ang nakatagak sa adlaw sa iyang paggikan.

Didto sa Saudi sa iyang pag-abot iya dayong nasinati ang kainit sa panahon. Nabati niya nga tinuod gayod ang giestorya sa iyang mga higala nga unang nakaadto sa Saudi ug matud pa nila nga kun duna lang sila’y trabaho sa Pilipinas, dili na lang gayod sila mapanimpalad lang aron lisodlisoron ang kaugalingon.

Lain pang kasinatian ni Sandro dihang bag-o pa lang siyang miabot sa Saudi. Kauban siya sa iyang mga kauban nga namasiyo sila sa downtown sa siyudad sa Jedda. Usa ka bata ang nag-inom sa tubig sa ice water. Unsay naabot sa bata gilabay niini ang ice water tumong sa nawong ni Sandro. Maayong pagka igo ni Sandro. Pastilan kun naa pa lang ang bata sa Pilipinas kalami gayong bunalan. Walay mahimo ang mga Pilipino. Sukad niadto wala na siya ganahing mamasiyo sa Jedda.

Usa ka buntag, nanawag ang amahan ni Sandro didto sa Saudi ug nagpahibalo kaniya nga kuno ang iyang asawa nga si Geva, dunay gikabuangan nga lalaki. Matud pa, ang lalaki, uyab ni Geva niadtong tua pa sila nagtungha sa high school.

"Pasagdi lang siya Sandro, total sukad kamo magminyo, wala man kamoy anak," pulong sa amahan. Nahigugma kuno ang asawa ni Sandro apan ang problema kuno kay nagkinahanglan kini’g anak. Ug tungod kay dugay naman nga sila wala, mao tingali nga napugos kini pagpangabit.

Naguol si Sandro ning sugilanon sa amahan kaniya. Gibasol dayon ni Sandro ang iyang kaugalingong amahan kay usa kini sa nagtukmod kaniya sa impiyerno. Dili man gayod unta siya mosugot nga manarbaho sa Saudi. Buotan si Geva ug nagtuo siya nga natental kini sa pagbuhat sa ingon. Tiaw mo nga bag-o pa lang siyang nakaabot sa Saudi unya mao na kini ang nahitabo kaniya.

Ning panahona, gusto na ni Sandro nga mopauli apan ang problema kay kapin pa lang siya sa unom ka bulan ug segurado nga dili gayod siya tugotan nga mopauli. Usa ka tuig ang gipirmahan niyang kontrato, busa segurado nga dili gayod siya tugotan.

"Kun mamugos ka, Sandro, pabayran man sa kompaniya ang ilang nagasto kanimo sa imong pag-abroad," matud sa manager. "Busa, sa gusto mo’g sa dili, dili ka pa makauli. Dako pa kaayo ang imong pulionon sa kompaniya."

Wala gayod mahimo ang gihangyo ni Sandro. Tungod niini, pipila lang ka bulan, nasakit si Sandro. Misaka ang iyang highblood ug matud pa sa doktor nga delikado ang iyang sakit kay kun dili siya maatiman, hayan mograbe ang iyang sakit ug molamay sa iyang kasingkasing. Tungod niini, ang kompaniya na lang gayod ang nangitag paagi nga makapauli si Sandro sa Pilipinas.

Puno sa pagbasol ang amahan ni Sandro dihang miabot ang iyang anak sa Pilipinas. Si Sandro halos wala nay umoy dihang gisugat siya sa airport. Dili na gani makaila sa iyang mga suod sa kinabuhi. Ug matud sa doktor nga naghatod kaniya, hayblad ug sagol sa kaguol ang gibati nga sakit. Ang masakit sa tanan kay wala na gayod mopatim-aw ang iyang asawa human kini mokuyog sa laing lalaki.

Mapait gayod ang Saudi diin nakuha ni Sandro ang iyang sakit. Maila sa panagway ni Sandro nga kun wala lang unta siya maminaw sa iyang amahan ug sa iyang asawa, dili unta siya mahiagom sa usa ka grabe nga sakit. Ug maluwas pa kaha siya sa iyang sakit? Ang Diyos na ang bahala sa iyang kinabuhi. (Kataposan)