Ang pagkabisto ni Noy Willy

Oy Willy...! siguro gyud lagak rong gabhiona ha! yawat nala'g makakuha kag gamay'ng isda nga ikasud-an nato inig ka ugma yamar ni Nang Iyay ngadto sa iyang bana samtang nagkukalingaw og pabulhot sa iyang tinustos.

"O Yay! Mangisda lagi ko ron" sanong ni Noy Willy nga nag-hapyud-hapyod usab sa iyang talisayong manok igtatari.

Untop alas syete sa gabii, bitbit na ni Noy Willy ang bugsay ug basket nga para sudlan sa mga kuhang isda. Apan maoy iyang nahinagboan ang iyang kompare nga dako kaayo'g ngisi, nga si Sir Ali. Ang bilyako nga retiradong maestro.

"Oy oy oy ... ayaw og panagat ron Pre" ni Sir Ali dayong babag sa agianan ni Noy Willy.

"Ngano man Pre?" sukna sa kompare.

"Ikaw gyud ang akong tuyo ron Pre. Kuyog ta.... kay naay bag-ong mga chicks sa KTV bar sa ilang Ciong-Lyn. Gikan pa kuno na sa Cebu mangadto ta kay mga lami raba kuno kaayo pre..." matintalong pangagda ni Sir Ali dayong panakla.

"Mating Pre, wa ra ba koy wawart ... Pre da..!" pangatarungan ni Noy Willy.

"Ayaw kabalaka Pre ... akoy bahala sa tanan..." ni Sir Ali dayong pakita sa iyang pitaka nga puno sa taggatos, kay bag-uhay pang nakadawat sa iyang pension.

Gawas nga mao say ampay, wa ka balibad si Noy Willy sa agda sa higal niyang kompare. Imbis sa baybayon paingon, sa bar ang rumbo sa duruha. Ug tuod man sa sulod sa maong bar, maayong nakasabak-sabak ni Noy Willy ug ni Sir Ali sa mga chicks nga mugbo kaayo'g gipang sul-ob. Sos, maayo raba kaayo mang-grind. Grabing nakapanakla sa duha nga nag sud-ong sa mga hubag nga naghiyod-hiyod sa ilang atubangan. Grabi gyung lingawa sa duha uban sa mga babaye. Alas tres na sa kaadlawon nanggawas ang managkompare sa maong bar. Ug karon, naproblema na si Noy Willy kun unsay iyang ipangatarungan sa iyang asawa aron di siya mabisto. Nausa iyang hunahuna. Kinahanglan patuohon niya si Nang Iyay nga gibalbal siya. Kinahanglan di siya mabisto, kay siguro man gyud nga dila ra way labod kun mahibaw-an siya niini.

"Tok tok tok ... yay...! Yay...! ablihi ko ... pagdali...." apora niya ngadto sa iyang asawa nga nagpakurogkurog.

"Oy, ngano ka Willy nagkurog kaman?" sukna sa iyang asawa.

"So-sos... day ... abi ko bag mamatay nako."

"Ha! Kay ngano man, unsa may nahitabo?" ni Nang Iyay nga mibati'g katingala.

"Gibugno kog abat Day... Sos...! abi ko ba'g magusbat naning akong tiyan" ni Noy Willy nga naghangos.

"Ha...! gi-ginuo ko Willy. So-sos ... maayo kay nakalingkawas ka?" ni Nang Iyay nga nibati nag kabalaka.

"Na nakalingkawas ko day kay ako mang gisuklan. Pe-pero ang akong gika-gul-an day ... kay nahabilin ang basket ... puno ra ba to sa isda" sigunda ni Noy Willy.

"Ay.... ayaw nalang to kagul-i Willy, ang importante nga buhi ka" ni Nang iyay nga maayo gyung pagkasulod sa drama ni Noy Willy.

Pagka buntag, maayo pang pagkahinanok ni Noy Willy. Gikapoy gyud kini sa bugno kagabii. Ug si Nang Iyay sayong nigawas sa ilang balay aron manusi-susi kun unsay mga balita sa gawas. Apan sa iyang pagawas maoy nisugat sa iyang panan-aw ang seksing babae nga care taker sa Ciong-Lyn KTV bar. Nahibulong si Nang Iyay kay nagbitbit man kini’g bugsay ug basket.

"Maayong buntag Nang!" pangatahuran sa babaye.

"Maayong buntag sad day..." mubong tubag ni Nang Iyay.

"Nang, naa imong bana Nang?" pangutana sa babaye "natulog pa raba day, kay ngano man unta day?" sukna ni Nay Iyay.

"Ay daaa ... nang imong bana Nang ay ... iyang bugsay ug basket nahabilin didto sa bar kagabii." Daling nitingkag ang dawgan ni Nang Iyay sa iyang nadungog.

Kalit nangurog ang kaunoran sa kalagot sa iyang bana. Bisan buntag sayo,pero mora na kini’g tigre nga kahambaton. Way daghang langay, gisaka ni Nang Iyay sa taas si Noy Willy. Ug didto gidabodabuhan kini niya’g bunal gamit ang bugsay.

"Pisti kang tawhana ka...! ingon ka kay nakigbugno kag abat! pero nakigbugno ka man diay'g burikat buanga ka...!" ni Nang Iyay nga askang isugang nibunal sa bugsay ngadto kang Noy Willy.

Way nahimo si Noy Willy, tungod sa nahabiling bugsay ug basket maayo gyud niyang pagkabisto. Ug wa na siya kapugong sa naghaguros nga bugsay nga gibunal ni Nang Iyay kaniya. Dali nalang kining nilayat sa ilang bintana.

"Pasayloa ko day ... kay di na ko mousab....!" ni Noy Willy nga nagtakiang nga nidagan pahilayo sa ilaha. (Kataposan)