Misyon sa kasingkasing

Gula 57

Midali sila si Bradley ug Sandra sa pagpaingon sa kusina. Didto sila molusot sa sekretong pultahan sa kusina. Sa nakagawas na sila, dihay armadong tawo nga ilang nasugatan. Maayo gani kay nakabantay dayon si Bradley ug naunhan niya kini pagpusil.

“Diri ta agi,” ni Bradley pa nga mibitad sa kamot ni Sandra.

Maoy ilang gisubay ang gamay’ng dalan-dalan nga mitadlas taliwala sa nagsikitsikit nga kabalayan lagbas sa squatter’s area sa unahan. Ug sanglit suheto si Bradley sa maong dapit, nalipat nila ang mga tawo nga migukod kanila.

“Animal!” Misinta sa kasuko si Morris Sta. Ana pagkasayod nga napakyas ang iyang mga sakop ug ingon man ang mga sakop ni Col. Rivera sa pagbawi ni Sandra gikan sa mga kamot ni Bradley.

“Abtik nga pagka-polis si SPO1 Mangubat, Mr. Sta. Ana,” nagkanayon si Col. Rivera. “Suheto usab siya niining lugara maong dali ra silang nakaipsot.”

“Dako na kaayo’g atraso kanako ang maong polis, Col. Rivera,” nagpaminti si Morris.

“Ayaw kabalaka, Mr. Sta. Ana,” matud ni Col. Rivera. “Dili molungtad og dugay ang kaidlas ni Mangubat. Mahulog ra gihapon siya sa atong mga kamot ug mabawi nato si Sandra.”

Wala madugay, dihay nangabot nga mga sakop sa print ug broadcast media. Si Col. Rivera ang miatubang kanila. -- Sumpayan pa