Gikasilagan ko ang kalibotan

Gula 64

Midali si Sonia pagduol sa pultahan aron unta kini ablihan ug mogawas. Apan serado kini. Bisan giunsa niya’g liso ang seradora apan dili gayod maabli. Gi-lock kini ni Ethan.

“Dili ka na makagawas, Sonia,” nagkatawa si Ethan.

“U-unsay imong buhatan kanako?” Mikurog sa kahadlok ang tingog ni Sonia.

“Wa koy daotang buhaton kanimo, Sonia. Ang gusto ko lang mao nga higugmaon mo ako.”

“U-unsa?”

“Gihigugma ko ikaw, Sonia. Ikaw lang ang gituohan ko nga makaalim sa samad sa akong kasingkasing nga gimugna ni Helen.”

“Apan dili mahimo kanang gusto mong mahitabo.”

“Ug nganong dili man? Tungod ba kang PO1 Roy Cleopaz?”

“Ethan...?”

“Nasayod kong nangulitawo kanimo ang maong polis. Gani, nakahigda na siya sa imong balay usa niana ka higayon.”

“N-nasayod ka niana.

“Way butang nga malilong kanako, Sonia.”

“Kun mao, i-ikaw diay tingali kadtong nakita ni Roy nga nanuop nga nagpahipi sa koral sa balay nga akong gipuy-an?”

“Husto ka. Ako kadto Sonia. Gipanid-an ko kun unsay iyang gibuhat. Apan gipasakitan ninyo ako pag-ayo.”

“Wala kami gibuhat nga daotan, Ethan. Gawas pa, wala kay katungod nga mangabubho tungod kay dili ko ikaw hinigugma.”

“Nganong dili man ko nimo higugmaon?” -- Sumpayan pa