Gula 56
“Hanggaw! Giunsa mo pagseguro nga walay lisensiya ang ilang mga armas. Gawas pa, wa kay katungod pagmando kun unsay angay kong buhaton.”
“Pwes, dili ka usab makapugos kun dili ko ihatag kaninyo si Sandra Diolan!”
Ang misunod nga mga gutlo giharian sa makalilisang nga mga butobuto sa mga armas.
Girakrakan nila ni Morris Sta. Ana, Col. Ver Rivera ug sa ilang mga sakop ang balay nila ni Bradley. Nasuta dayon ni Bradley nga desidido gayod nga mopatay ang maong mga tawo basta makuha lang nila si Sandra.
Mibawos si Bradley sa pagpabuto. Unya midali siya pagpaingon sa kuwarto nga nahimutangan ni Sandra kay iyang nasuta nga wala gayod siya’y dag-anan kun suklan niya ang maong mga tawo kay daghan sila.
Naabtan niya si Sandra nga nagkurog sa kahadlok sulod sa lawak.
“Mamiya kita dinhi,” ni Bradley pa. “Daghan kaayo sila ug may back-up pang mga polis.”
“U-unsa?” Tuaw ni Sandra.
“Mao nga mamiya dayon kita dinhi samtang dili pa ulahi ang tanan.”
Migawas sila sa lawak. Niining higayona, mitang-on ang mga buto-buto. Apan nasayod si Bradley nga anaa pa sa gawas ang mga tawong armado ug nakapahimutang na sila’g maayo. -- Sumpayan pa