“Tungod kang Helen nahimong miserable ang akong kinabuhi Sonia. Mao kini ang hinungdan nga dili ko gayod siya mapasaylo.”
“Pero patay na si Helen Ogmoc, Ethan. My God! Angay mo nang kalimtan ang masakit niyang gibuhat nganha kanimo.” “Kuwang pa alang kanako ang iyang kamatayon. Kun mahimo pa lang, sublion ko siya sa pagpatay sa makadaghan.”
“U-unsay buot mong ipasabot?” “Akoy nagpatay kang Helen Ogmoc,” direktang pag-angkon ni Ethan.
Nakugang pag-ayo si Sonia. Nahasibog siya palayo kang Ethan. Gibati niya ingon sa naminhod ang iyang nawong, kaha tungod kay nakalitan siya sa kasayoran nga gitug-an ni Ethan kaniya.
Wala siya magdahom. Bisan sa damgo lang, wala gayod siya magtuo nga si Ethan maoy responsable sa kamatayon ni Helen Ogmoc.
“Gipatay ko siya puslan man nga dili makabaton og katumanan ang among gugma,” matud ni Ethan. “Pinaagi sa iyang kamatayon, dili usab matuman ang iyang pangandoy nga mahimong usa ka inilang modelo sa tibuok kalibotan.”“
“I-ikaw ba usab ang nagpatay kang Ninez nga burikat?” Mipatigbabaw pa gihapon ang kamaukiton ni Sonia isip reporter bisan og inanay na siyang mibati'g kahadlok tungod sa iyang nadiskubrehan nga usa diay ka tawong kriminal ang iyang gikauban karon.
“Oo,” miangkon si Ethan. “”Ako gihapon ang nagpatay kaniya.” “Pero usan man usab ang nahimo niyang sala nganha kanimo?” -- Sumpayan pa