Misyon sa kasingkasing

Pero nahibulong si Bradley. Imbes nga arestohon nila ni Col. Rivera ang grupo ni Morris Sta. Ana gumikan sa paghupot sa maong mga tawo ug mga armas nga tag-as og kalibre, nakigsulti na man hinuon ang koronel kanila. Sa iyang tan-aw, mora’g daan nang managkaila ang duha. Naglibog si Bradley sa iyang nasaksihan.

“Mangubat,” gisangpit si Bradley ni Col. Rivera. “Way kapuslanan ang pagtago nimo kang Sandra Diolan. Ihatag siya kanamo. Siya ray among tuyo. Ug wala usab kami daotang tuyo kaniya.”

Sa nabati ni Bradley, nakasabot gilayon siya kun hain makapusta si Col. Rivera. Apan nasayod siyang husto ang iyang gibuhat nga pagpanalipod kang Sandra. Wala siya’y nalapas nga balaod sa iyang paghimo sa ingon. Mao nga ipadayon gayod niya ang pagpanalipod niini.

“Col. Rivera,” gisangpit ni Bradley ang koronel. “Nasayod na ko sa tinuod nga hinungdan kun nganong buot ninyong kuhaon si Sandra Diolan. Pero dili ninyo makuha si Sandra sa dakong kasayon.”

“Ayaw paabota, Mangubat,” ni Col. Rivera pa,” nga magkaunay kita.”

“Wa koy tuyo nga makig-unay nimo, Col. Rivera,” ni Bradley pa. “Apan ayaw kalimot nga tinugyanan ka sa balaod. Katungdanan mo ang pagdakop sa mga tawong maghupot og mga armas nga walay lisensiya sama nila ni Morris Sta. Ana.” -- Sumpayan pa