Misyon sa kasingkasing

Gula 45

“May mga tawo nang nangita nimo dinhi sa Cebu, Sandra,” gidiretso ni Bradley ang buot niyang isulti ngadto sa dalaga.

“U-unsa?” Mikunot ang agtang ni Sandra samtang mitutok kaniya.

Wala na modugang pagpasabot si Bradley. Gikuha hinuon niya ang dalang pamantalaan ug gipabasa ngadto ni Sandra ang anunsiyo.

“N-no,” nakaingon si Sandra human mabasa ang anunsiyo.

Nakita ni Bradley nga miluspad ang dalaga. Nanubod ang hagkot nga singot sa liog ug agtang niini.

“Na-trace na nila nga nia ka sa Cebu,” ni Bradley pa. “Posibleng ang mga tawo nga nangita kanimo mga sinugo sa imong amahan o ni Morris Sta. Ana.”

“Kuwang ko’g pagtuo nga si Papa Fernan ang nagsugo og mga tawo sa pagpangita kanako,” ni Sandra pa. “Mas dako ang posibilidad nga binuhatan kini ni Morris.”

“Kanang cellphone number nga gibutang sa ubos nga bahin sa anunsiyo,” ni Bradley nga may buot tukion,” mao ba kana ang numero sa cellphone sa imong amahan?”

Gitamdan ni Sandra ang pamantalaan. Gisuhid niini ang cellphone number nga gipatik uban sa anunsiyo. Iyang gisuta kun kang kinsang numero ang gipatik uban sa anunsiyo aron masayran kun kinsa ang mga tawo nga nangita kaniya. -- Sumpayan pa