“Nganong mabulilyaso man nga dili man nato ilakip pagbutang ang imong ngalan sa anunsiyo? Gawas pa, wala man kaha kita’y daotang tumong sa pagpangita sa maong babaye?”
“Wala kitay daotang tumong. Ang gusto ko lang nga makit-an nato siya aron mahinayon ang among kasal.”
“Pwes, mao kini ang angay natong buhaton. Magpagawas kita’g anunsiyo sa mga pamantalaan. Gawas niini, palihukon ko usab ang akong mga tawo.”
Pagkaugma, migawas dayon sa mga pamantalaang lokal sa Sugbu ang hulagway ni Sandra uban ang anunsiyo nga may mga tawo nga nangita kaniya. May cellphone number nga gibutang sa ubos nga bahin sa anunsiyo nga maoy kontakon ni bisan kinsa nga may kasayoran kun hain si Sandra. Wala ibutang ang ngalan sa tag-iya sa maong numero.
Nakugang si Bradley pagkabasa sa maong anunsiyo. Gibutang sa anunsiyo nga na-trace na nga ania si Sandra sa Cebu. Misantop sa hunahuna ni Bradley nga posibleng nakaabot na sa Sugbu ang mga tawo nga nangita sa dalaga.
Gipakigkitaan dayon ni Bradley si Sandra aron kini pahibaloon mahitungod sa maong kasayoran. Midalikyat siya sa restaurant sa iyang inahan sa Manalili nianang pagkaudto. Didto si Sandra nga miabag sa mga katabang ni Nang Diday sa mga buluhaton sa restaurant.
Gidala ni Bradley si Sandra sa kinaibabwang andana sa Plaza Fair diin nahimutang ang daghang kan-anan aron magkasulti sila’g maayo. Mipahimutang sila sa bakanteng lamesa nga bag-o lang gihawaan og kustomer. -- Sumpayan pa