Gula 42
“May shipment na ba usab kita, Mr. Sta. Ana?” Nangutana si Col. Rivera samtang ilang gisaw-an ang makabusdik nga mga pagkaon nga gihamyang sa taas nga lamesa.
Si Col. Rivera maoy pangulo sa police scalawags sa Sugbu nga maoy mo-back-up nila ni Morris sa higayon nga may shipment sila sa mga armas nga ipalusot gikan sa Mindanao paingon sa Cebu. Usa ka bigtime gun smuggler si Morris Sta. Ana nga may koneksiyon sa pipila ka hiwi nga sakop sa PNP sa Sugbu.
“Dili unta kita maghisgot bahin sa shipment karon, Col. Rivera,” nagkanayon si Morris. “Aduna ko’y problema nga gusto kong magpatabang kanimo.”
“U-unsa man kana, Mr. Sta. Ana?” Sukit sa Koronel.
Wala motubag si Morris sa pangutana. May gikuha kining hulagway gikan sa attache case. Hulagway ni Sandra. Gitunol niya kini ngadto kang Col. Rivera.
“Kinsa man kining babayhana?” Gitutokan sa Koronel ang hulagway.” Mora man kini’g si Britney Spears. Ug mora’g familiar na nako ang dagway.”
“Siya si Sandra Diolan,” matud ni Morris. “Napatik na ang hulagway nianang babayhana sa usa ka nasudnong pamantalaan.”
“Mora’g husto ka. Sa pamantalaan nako nakita ang hulagway niining babayhana. Wala lang ko mahinumdom kun unsay estorya niadto.” -- Sumpayan pa