“Ngano man? To refuse an offer is a big insult. Tingalig mainsultohan hinuon si Debra nga imong gibalibaran. Babaye gud siya.”
“Dili pa ko andam mosulod sa kinabuhing minyo, Sandra.”
“Unya, unsaon na man lang niini karon nga gipahibalo na man ni Debra ang iyang mga bisita nga minyoonon na kamo? Tingalig nag-expect na siya nga misanong ka na?”
“Bahala siya. Basta kay nasayod na siyang dili pa ko andam ug wala pa ko mo-commit sa iyang pagpanghagad nako. Ug kay nag-unauna man siya’g pahibalo nga minyoonon na kami, iya na kanang risgo.”
Nangabot ang grupo ni Morris Sta. Ana sa Sugbu. Nakadawat sila’g report nga si Sandra Diolan ania mopaingon sa Sugbu. Na-trace sa mga tawo nga iyang gipalihok nga may record si Sandra sa buhatan sa Cebu Ferries. Nakompirmar nga nakasakay si Sandra sa usa sa mga passenger vessel sa Cebu Ferries gikan sa Cagayan de Oro paingon sa Cebu mao nga ila kining gisundan.
Gipatawag gilayon ni Morris ang iyang contact sa dakbayan sa Sugbu, si Col. Ver Rivera. Nagkita sila sa usa ka kan-anan sa dalan Pelaez nga maoy naandan nilang tagboanan sa matag higayon nga moanhi si Morris sa Sugbu. May conference room ang maong kan-anan nga maoy ilang giokupar. Aduna sila'y privacy sa maong dapit ug walay laing makabati sa confidential nga mga butang nga ilang panagsultihan.
Kuyog ni Col. Rivera ang pipila sa mga sakop niining polis. -- Sumpayan pa