Nanghagis si Talya

Nanggawas sa ilang balay ang mga lumolupyo sa sityo Kantaguktok sayo sa buntag sa kusog nga singgit ni Talya. Nagwarawara kini sa gikuptang sundang. Morag si Gabriela Silang nga mosulong sa panggubatan.

Nagpangutkot sa ulo ang mga tawo, nagpangutan-ay kun unsa ang nahitabo. Usa sa nahigmata mao si Susie. Nagdali siyang miduol sa iyang Nanay Seling nga didto na sa ilang silong.

"Ngano na si Nang Talya, Nay?" Nagtan-aw si Susie sa ilang silingan nga nagpadayon pagsinggit. "Nanghagis man?"

"Ada, ang pinangga niyang anak dalaga, mikagiw kagabii."

"M-Mao ba." Mikurog ang tingog ni Susie kay nakita niya si Talya nga isog kaayong nagpaingon kaniya. Mikupot siya sa bukton sa iyang inahan nga nahibulong nga mitutok kaniya.

"Hoy! Hain si April? Hain, Susie?"

Giwarawarahan si Susie ni Talya sa gikuptan niining sundang nga hait kaayo. Misamot ang kahadlok ni Susie.

"W-Wa ko kahibawo, Nang." Mikurog ang tingog ni Susie.

"Unsay wa? Barkada mo ug ikaw ang kauban ni April sa pagsuroy kagabii sa plasa sa lungsod?"

Nahadlok na gyod pag-ayo si Susie. Napugos siya sa pagtug-an sa iyang nasayran.

"K-Kuan, Nang, miuna ko sa pagpauli. Gibiyaan ko sila si April ug Noy Nanding sa Plasa."

"Ha!" Naniga ang mga mata ni Talya. Misamot kabudlat ang budlaton nang daan niyang kalimutaw. "Ang biyudo gyong dako ang iyang gipili nga daghan mang ulitawo ug batan-on nga nangulitawo kaniya.?"

"Naghilak man gani to si April." Hapit dili makagawas ang tingog ni Susie.

Tinuod nga biyudo ug hamtong na si Nanding apan guwapo kini ug maskulado ang lawas. Husto sa gitas-on. Angayan silang pareson si April bisan bayinte singko pa ang edad niini. Nakahuman kini sa kolehiyo ug nagtrabaho sa munisipyo sa lungsod. Maayo sab og trabaho si Nanding sa siyudad.

"Salbahis ka, Nanding! Nganong si April man gyod?"

Nagtinan-away si Susie ug ang iyang inahan kay naghilak si Talya nga nagwarawara sa iyang sundang. Nagdali kining mipaingon sa balay ni Nanding nga dili layo sa ilang nahimutangan.

"Bawion ko si April nimo, Nanding! Bawion nako kay kita ang angayang pareson kay biyuda sab ko!"

"Nadungog kaayo ni Susie ug sa iyang inahan ang gisinggit ni Talya nga unom na ka tuig nga nabiyuda.

"Mao diay nga dako kaayo ang pagsupak ni Nang Talya kang Nanding para kang April kay hilom diay niyang gimahal ang biyudo?" Hilom nga nakatuaw si Susie.

Apan wala nay nahimo si Talya kay mabdos na si April sa ilang anak ni Nanding. Giluom nalang niya ang iyang kaguol sa kapakyasan sa iyang gugma kang Nanding.

Paglabay sa usa ka bulan, gikasal si Nanding ug April. Ug ang lalaki nga gimahal ni Talya, nagtawag na kaniya’g "Mama". (Kataposan)