Saksing napagan

Tinuod ba kanang imong gisulti, Pilo, nga nagluib kanako ang akong asawa? banghag ni Nonoy ngadto sa iyang silingan usa ka adlaw niana. "Tinuod lagi ang akong gisulti Noy. Saksi ko sa iyang pagbudhi kanimo," tubag ni Pilo nga nagpanlingi sa iyang luyo pagseguro nga way laing tawong nakabati.

Usa ka trabahante si Nonoy sa usa ka kompaniya sa konstruksiyon sa dakbayan sa Mandaue ug Sabado sa gabii na siya   sagad makauli sa ilang balay sa Barangay Guba, usa ka bukirang barangay sa siyudad sa Sugbo. Lima na ka tuig gikan sa ilang pagminyo apan wa pa gyud sila makabaton og anak.

"Daw di ko makatuo sa gitug-an kanako ni Pilo. Hinuon may pagduda ako ni Onyot nga labihang makatan-aw sa amo kun moagi na siya. Ingon sa may gipangita." Naghinoktok si Nonoy usa ka gabii niana samtang nagpabuhot sa sigarilyo duol sa bentana sa ilang balay.

"Oy Nonoy, matug na ta. Mosayo pa raba ka ugma kay Lunes na ug may trabaho ka." Tingog sa asawa niyang si Sering.

"Una lang sa paghigda, 'Ring. Mosunod ko karong taudtaud," ni Nonoy ngadto sa asawa.

"Kun wa magbakak si Pilo sa iyang gibutyag kanako siya unya ang akong himuong saksi kun akong ikiha ang akong asawa," ni Nonoy sa iyang kaugalingon dayong sud sa ilang lawak.

Nianang pagkaugma, wa mahinoltol sa iyang trabaho si Nonoy nga naghunahuna sa gisulti sa iyang silingan.

"Pakalitan ko si Sering karong gabii. Mopauli ko’g sayo kay nagtuo siyang sa Sabado pa ako mopauli."

Pasado alas diyes na sa gabiing miabot si Nonoy sa ilang balay nga wa masayri sa iyang asawa. Dali siyang nakasud kay may duplikado siyang yawing gida. Midiretso siya sa kusina ug gikuha ang taas nga pinuti.

"Maayo ning makapangandam kay basin maunhan sa kabit sa akong asawa kun magkinaunsa man ugaling," ni Nonoy pa nga hinay'ng mipaingon sa ilang kwarto aron di moigot ang sawog nga kawayan.

Duol na siya sa pultahan sa ilang lawak ug nabati niya ang paraygong tingog sa iyang asawa.

"Imo na sab ko rong gabhiona, Nyot...."

"Nindota nimo’g dughan Ring oy, way bun-og. Wa man gud kay anak," tubag sa lalaki.

"Tingog man to ni Onyot. Daan pa lagi ko! ni Nonoy pa dayong tindak sa pultahang kawayan.

Naabli kini ug misugat sa iyang panan-aw si Onyot ibabaw sa iyang asawa ug pulos mga hubo.

"Mga salbahis!" singgaak ni Nonoy dungan ang paghansak hinurot ang kusog sa pinuti ngadto sa bukobuko sa lalaki.

Tuyo niyang molapus ang tumoy niini ngadto sa iyang asawa nga nailawom samtang naghayang sa sawog nga kawayan.

Nagkadaiyang singgit sa kasakit ang nabati ni Nonoy nga mibiya sa ilang balay ug mitahan sa iyang kaugalingon ngadto sa mga barangay tanod sa ilang dapit.

Didto sa barangay hall diin siya temporaryong gitanggong, labihan niyang kurata sa dihang miabot ang mga polis pagkabuntag ug giingnan siya nga tulo ang iyang napatay.

"Nganong tulo man sila nga duha ra man tong akong nakita paghansak nako sa pinuti, Sir?"

"Dunay laing naigo sa iyang mata sa silong sa inyong balay. Giila siyang si Pilo, Noy. Dugay ganing naibot ang pinuti kay maayong pagkataup niini." Matud sa polis nga wa mapugngi ang pagngisi. (Kataposan)