Gula 37
Nahilom ang iyang cellphone pagkataudtaod. Apan wala madugay subli kining mibagting. Ang iya gihapong amahan maoy nanawag. Wala gihapon niya kini tubaga hangtod nga mihunong ang pagbagting sa iyang cellphone.
Mitingog ang message alert tone sa iyang cellphone. Ang iyang amahan maoy nag-text. Naghangyo kini kaniya nga tubagon ang tawag niini. Wala siya mo-reply sa text sa iyang Papa Fernan.
Mibagting na usab ang iyang cellphone. Pero wala gayod niya kini tubaga. Dili siya buot makigsulti sa iyang amahan tungod kay dili siya buot madala ug matandog sa unsa may ihangyo niini kaniya.
Makapila magsubli-subli pagtawag ang iyang Papa Fernan apan wala gayod niya kini tubaga. Unya dihang si Morris Sta. Ana na usab ang nanawag kaniya, gi-off na gayod ni Sandra ang iyang cellphone.
Sulod sa iyang lawak naghinuktok si Bradley. Naghayang siya ibabaw sa katre samtang ang iyang mga mata nagpitokpitok nga mitutok sa kisame. Maoy diha sa iyang hunahuna ang kahimtang ni Sandra.
Nabati niya kaganina ang sagunson nga pagbagting sa cellphone ni Sandra nga wala tubaga sa dalaga. Misantop sa iyang hunahuna nga malagmit si Morris Sta. Ana ang nanawag kang Sandra maong wala tubaga ang maong tawag sa dalaga. -- Sumpayan pa