Gula 36
“Niining higayona,” ni Sandra pa, “ikaw ang akong sundon kanunay, Bradley. Gisalig ko kanimo ang akong kapalaran.”
“Relaks lang,” mipahiyom ang ulitawo kaha aron pagpakalma kaniya. “Safe ka dinhi. Dili ka daling matultolan ni Morris Sta. Ana.”
Mituo si Sandra sa gisulti ni Bradley. Ug misalig siya niini. Apan may kabalaka pa gihapon nga naglagubo sa iyang dughan.
Dihang nag-inusara na si Sandra sulod sa iyang lawak, gi-text niya ang iyang amahan. Nangumosta siya niini pinaagi sa text. Gipangumosta usab niya ang iyang Mama Casilda.
Wala niya itug-an sa iyang text nga ania siya sa Cebu. Igo lang niyang gisugilon nga wala sila’y angay kabalak-an kay maayo ang iyang kahimtang sanglit mga maayo’g kabubut-on ang mga tawo nga iyang nadangpan.
Pipila ka gutling ang milabay mitingog ang incoming call alert sa iyang cellphone. Nanawag ang iyang Papa Fernan. Gikulbaan siya. Nagduhaduha siya pagtubag sa tawag niini.
Nagpadayon pagbagting ang iyang cellphone. Gipasagdan niya kini. Nakahukom siyang dili tubagon ang tawag sa iyang amahan. Dili pa siya andam nga makigsulti sa iyang Papa Fernan. Kun unsa man ang isulti niini kaniya, dili pa siya andam nga mamati.
Basta nga igo na alang kaniya nga nasayod sila nga maayo ang iyang kahimtang ug dili sila angay mabalaka. Dili pa siya andam nga manubag sa posibleng pagsukitsukit sa iyang amahan kaniya mahitungod sa iyang paglayas ug kun hain siya karon. -- Sumpayan pa