Ang managhigala

Kun ang kasuod sa panaghigala, lagmit wa nay makalabaw kanila ni Flor ug Liza. Best friend forever ang pag-ila nila sa usa’g usa. Pulos sila mga dalagang-gulang, lapas na sa mga petsa sa kalendaryo ang ilang edad. Unsaon, way naninguha sa ilang gugma.

Gawas nga managsamang tambok, mga bati pa gyod og nawong. Hinuon, gitagaan sila og komplemento sa Ginoo. Pulos sila nakahuman sa kolehiyo ug nagtrabaho sa opisina sa siyudad.

Kun way trabaho, sama sa adlaw nga Domingo, manuroy sila. Mag-window shopping sa mga mall labi na sa SM City. Kun tingsuweldo, bisag unsa lang ang ilang paliton. Mangaon sa gawas. Todo-todo, maong wa gyod mohiyos ang ilang lawas. Usahay manan-aw sila og sine. Mag-bowling silbing ila kuno ehersisyo.

"Basta, way makaguba sa atong pagka amiga, ha?" Usa ka adlaw nga nanuroy sila, gipadayag ni Flor ang diha sa iyang hunahuna.

"Molang!" Mikatawa si Liza. "Forever god tang best friend."

Apan gitiawan sila sa kapalaran, mora bag gisukod ang ilang pagbati isip managhigala. Gikaila nila si Art. Guwapo, macho ug sama sab kanila, propesyonal ug nag-opisina. Kilig to the max ang gibati ni Flor ug Liza ngadto kang Art. Parehas silang nahigugma ngadto sa lalaki.

"Akoa si Art, ha, Flor. Ayaw pangilog." Nanighawak si Liza.

"Unsay imo? Ang iya lang pilion natong duha?" Nanighawak sab si Flor.

Ug kadto ang sinugdanan nga inanay nga di na maayo ang tinagdanay sa duha. Nag-ilog sila kang Art. Unsaon, di na sila gustong mawala pa kanila ang lalaki nga nahimo nilang inspirasyon. Ug ang ilang motto nga best friend forever, nagkaanam na gyod sa pagkahilis.

Usa ka hapon, nagpaminti sa kasuko si Flor dihang nakita niya si Liza ug Art nga malipayong nangaon sa Jollibee. Morag molugwa ang iyang mga mata sa kasiga. Morag migawas sa iyang ilong ug dalunggan ang aso sa pangabubho. Kinahanglang makig-date sab siya kang Art, mao kini ang diha sa iyang hunahuna.

Domingo sa gabii. Gilaayan si Liza sa balay. Nakahunahuna siya sa pagpanihapon sa gawas. Tuod man, misulod siya sa Chowking. Misaka ang dugo sa kapungot sa iyang ulo dihang nalantawan niya si Flor ug Art nga naghinungitay sa pagkaon sa sulod sa maong kan-anan. Kadasmagon siya kang Flor. Gusto niya kining bugnoon. Pero nagpugong lang siya sa iyang kaugalingon kay daghang kustomer sa sulod. Maulaw siya.

Nakita siya sa duha. Gipahiyoman siya ug giwarawarahan sa kamot. Misamot ang gibating kalagot ni Liza. Sa iyang pagtuo, gisulogsulog siya sa duha. Puwerte niyang yawyaw nga migawas sa Chowking. Kalit siyang nawad-an og gana sa pagkaon.

Ug miabot ang higayon sa panagtigi. Nagkita sila si Flor ug Liza sa Plaza Independencia. Nagsiningkahay sila.

"Imong giilog si Art nako!" Gitulisok ni Liza si Flor.

Midasmag si Flor. Misukol si Liza. Naglinabnotay sila sa buhok. Nagkinawrasay sila. Nahunong lang ang ilang panag-away dihang nahiabot ang mga polis. Gidala sila sa police office. Nagginaksanay sila ug nagpinasayloay.

Nahibalik na gyod ang ilang pagka best friend forever dihang usa ka adlaw ilang nasayran nga dakong minyo diay si Art ug daghang anak. Karon, malipayon na sab silang mag-uban sa pagpanuroy. (Kataposan)