Gikasilagan ko ang kalibotan

"Akong sutaon kun unsa gayod ang sulod nianang maong plastic bag. Maayong makaseguro na kita sa dili pa kita manawag og polis."

"Husto kanang imong ideya."

Dihadiha gikuha ni Ethan ang flashlight gikan sa mga kamot ni Sonia. Mihinay pagkanaog si Ethan ngadto sa suba. Nahibilin si Sonia sa ibabaw sa tulay nga naghinan-aw sa gihimo sa lalaki.

Nakita ni Sonia nga mipunit si Ethan og putol nga kahoy nga may igong gidak-aon. Dihang nakaabot na ang ulitawo sa duol sa plastic bag nga nahimutang sa daplin sa suba, gigamit niini ang putol nga kahoy nga gigunitan. Gidugkal og hinay ni Ethan ang plastic bag.

"Positive," nakaingon si Ethan nga midali pagbalik sa ibabaw nga bahin sa suba, sa may karsada.

"Unsay buot mong ipasabot?" sukit ni Sonia.

"Tawo ang sulod sa plastic bag. Labing maayo nga magtawag kita'g mga polis."

Maoy miresponde sa tawag nila ni Sonia ug Ethan ang mga polis nga magpatrolya sa Manga District. Ila dayong gisusi ang sulod sa plastic bag.

Tuod, wala masayop si Ethan. Patay'ng lawas ang sulod sa plastic bag. Ug usa gihapon ka babaye ang biktima.

"Unusual na kining hitaboa," nagkanayon si Ethan "karon lang kini nahitabo dinhi sa siyudad sa Tagbilaran."

"Bitaw," ni Sonia pa. (Sumpayan pa)