Misyon sa kasingkasing

Gikulbaan si Sandra, dili tungod kay nahadlok siya nga sila rang duha si Bradley sulod sa kuwarto, kundili tungod kay ang mao nilang panag-uban naghatod og talagsaong excitement sa iyang dughan.

Misantop sa hunahuna ni Sandra nga importante gayod kaayo ang buot pakigsultihan ni Bradley kaniya tungod kay gusto man gayod kini'g privacy. "U-unsay atong panagsultihan?" Gipangutana niya ang ulitawo. "Bahin nimo," maoy tubag.

Mikunot ang iyang agtang samtang mitan-aw sa ulitawo.

Gipakli ni Bradley ang mga panid sa nasudnong pamantalaan nga gigunitan niini. Daw may gipangita. Ug sa panid sa mga anunsiyo mihunong kini. "Basaha kana," ni Bradley pa nga mitunol sa pamantalaan ngadto kaniya.

Gidawat ni Sandra ang pamantalaan gikan kang Bradley. Naniga ang iyang mga mata dihang iya kining gitamdan. Diha sa pamantalaan ang iyang hulagway. Si Mr. Fernan Diolan, ang iyang amahan, nagpagawas og anunsiyo sa usa ka nasudnong pamantalaan aron pagpahibalo sa iyang pagkahanaw.

Gisaysay sa anunsiyo nga milayas siya gikan sa ilang pinuy-anan didto sa Davao City. Gipangita na siya sa iyang mga ginikanan nga nabalaka na kaayo mahitungod kaniya. Mitanyag ang iyang amahan og ganti ni bisan kinsa nga makahatag og impormasyon kun hain siya karon. (Sumpayan pa)