Misyon sa kasingkasing

Sayong nanirado sa restaurant si Nang Diday nianang pagkahapon. Kadali ra man gud nga nahurot ang gibaligya nilang mga pagkaon ug sud-an nianang adlawa. Ang gipasanginlan ni Nang Diday mao si Sandra. Na-attract kuno ang mga kustomer kaniya maong midagsang ang mga mangaonay sa restaurant niini.

Sayong nakapauli sa Talamban sila si Sandra ug Nang Diday. Pero naunhan pa sila ni Bradley. Sa ilang paghiabot diha na si Bradley sa sala, nagtan-aw sa TV Patrol Central Visayas nga sila si Leo Lastimosa ug Haydee Acuña maoy mga program host.

Si Nang Diday midiretso sa kusina. Si Sandra miduol sa nahimutangan ni Bradley nga naglingkod sa sopa.

“Sayo lagi kang nahiabot karon?” Sukit sa dalaga.

Wala tubaga ni Bradley ang iyang pangutana. Gipalong hinuon niini ang telebisyon. Mibati’g diyotay’ng kahibulong si Sandra sa gipakitang lihok ni Bradley.

“Mahimo bang magsulti ta?” Misumbalik pagpangutana si Bradley kaniya.

“Nga-nganong dili,” niya pa. “B-bahin sa unsa man kana?”

“Adto ta sa imong kuwarto magsulti aron walay makadungog natong lain.”

“S-sige...”

Misulod sila sa iyang kuwarto. Namatikdan ni Sandra nga nagbitbit si Bradley og pamantalaan. Apan wala kini niya hatagi’g pagtagad.

Gisirad-an ni Bradley ang pultahan sa dihang didto na sila sa sulod. -- Sumpayan pa