Ang babaye su'd sa banyo sa mga lalaki

CEBU, Philippines - Nahigmata ko. Gipasiklapan ko dayon ang akong relo-de-pulso. Untop alas 4 sa kaadlawon. Mitimbakuwas ko sa kutson nga akong gihigdaan. Sa sulod sa halapad nga wanang sa dakong lawak, nahinanok pa ang tanan kong kaubanan nga Lupon sa among Barangay Lorega San Miguel. Hilabihan sa kakusog sa hagok nila ni George ug Vic diha sa tagsatagsa nila nga gihigdaan nga kutson. Sila si Percy ug Cesar, parehas nga nagtakilid paghigda. Sila si Cito ug Pepe sab, nahinanok nga nagnganga ang mga baba, nga daw giganoy sa katam-is nga katulogon, tungod sa kabugnaw sa giistaran namong lawak. Kaming tanan nag-ipon sa pagpanghigda sa halapad nga lawak, apan nagtasatagsa og kutson nga gihigdaan.

Gikuha ko dayon ang dala kong tualya, sabon nga pangkaligo ug shampoo. Migawas dayon ko sa pultahan sa lawak aron mopaingon sa banyo. Naanad man god ko nga sayong maligo matag kaadlawon. Sa pikas lawak, nga gihigdaan sa among barangay kapitan, Kap Fritz ug kalihim sa among barangay, kalihim Raffy, nagmingaw pa usab nga seguradong nahinanok pa sa pagkatulog.

Abtik kong mipadulong sa desenteng banyo alang sa mga lalaki. Unang higayon ni nga makaligo ko sa sulod sa Central Visayas Regional Project (CVRP) Hall, nga maoy among giistaran sa duha namo ka adlaw nga re-orientation seminar sa mga Lupon dinhi ning bukiran nga barangay sa Barangay Taptap nga gipanag-iya sa kagamhanan sa siyudad sa Sugbu. Ang venue sa among seminar mao ang function room sa Cebu City Resource Management & Development Center (CCRMDC) nga gipanag-iya gihapon sa kagamhanan sa siyudad sa Sugbo ug nahimutang sa ubos nga bahin sa CVRP Hall nga among giistaran.

Hayag ang banyo sa mga lalaki niadtong orasa sa kaadlawon kay dili man pagngon sa mga caretaker ang mga plorisen nga suga. Apan napaatras ko sa pagsulod nako sa pultahan sa banyo. May babayeng naligo sa shower nga klaro kaayong nabantang sa akong panan-aw. Hubo ang tibuok niyang pamayhon. Taas ang buhok nga misangko sa iyang lukonan. Hilabihang putia sa is-is nga pamanit. Mestisa.

Sus, nakapanglad-ok ko nga nagtan-aw sa bus-ok niyang duha ka tutoy nga nagpanikad sa tumang katugsoy, uban ang pula-pula niining mga nipples. Pagkabugol sa duha ka paa nga nagtindog nga mibila ug paspas nga gisabunan ang pinong salibunhon nga nagdagtom diha sa nag-ugbon niyang bisong ug gipukitpukit pa ang ngabil niini.

Bida, nanginit ang akong lawas, uy! Wa ko kapugngi ang paghangad sa akong tarugo nga daw nangayo og ulan sa langit. Apan kay praise the LORD na lagi ko, mihinay ko'g gula sa pultahan sa banyo aron hulatan na lang nga mahuman og kaligo ang maong babaye nga nagparegla og kaligo sa banyo sa mga lalaki.

Nakapanakla ko. Sus, kun ang kauban kong Lupon nga si George nga hilabihan katsikboy, mao pa ang nakasakop ning maong mestisang babaye, segurado gyung bugha ning babayhana.

Nagpahiyom pa ang mestisang babaye nga migula sa pultahan sa banyo ug nagtapis na og tualya. Mikihat siya nako.

"Fred, ikaw nay sunod og kaligo...!"

Miiknat ang akong kilay. Nakaila man nako ang mestisa. Butangi! Samtang padayon ko nga naligo sa sulod sa banyo, gihamok gihapon ko sa kalibog nga naghunahuna sa maong mestisang babaye nga sayong naligo sa banyo sa mga lalaki, nga unta, anaa may banyo sa mga babaye.

Gikan sa caretaker sa CVRP HALL, nasayran ko nga aduna sila'y engkantada nga mopatim-aw sa maong banyo ug maligo matag kaadlawon. Gililong ko nalang sa akong kaubanan ang kahibulongan kong nasaksihan. (Kataposan)