CEBU, Philippines - Wala motingog si Sonia. Apan misantop sa iyang hunahuna nga migamit sab si Ethan sa utok niini. Kay kun nagpasidaan pa gyud kini nga mobisita kaniya, iya gayod kining balibaran. Pero kay nia na man si Ethan sa iyang gipuy-an, iya na lang kining girespetaran.
“Importante kaayo kining akong tuyo nimo, Sonia,” nagkanayon si Ethan.
“Unsa man kana?” sukit sa dalaga.“Bahin ba kana sa atong trabaho?”
“No,” ni Ethan pa. “Wa kini kalabotan sa trabaho.”
“Bahin sa unsa man diay kana?”
“Bahin sa suliran sa kasingkasing.”
“U-unsa?”
“I love you, Sonia...”
“Shit!” Misurok ang dugo ni Sonia pagkadungog sa maong mga pulong.
“I’m sorry, Sonia,” ni Ethan pa. “Nasayod ko nga dili ka gustong makabati sa maong mga pulong. Pero mao kana ang matuod kong gibati.”
“Damn you, Ethan!”
“But I love you, Sonia. Mao kana ang matuod.”
“Kun dili ka gustong masuko ko nimo, ayaw na paghisgot bahin sa gugma. Nakasabot ka ba?”
Wala motingog si Ethan.
“Kun dili ka mopatuo nako,” ni Sonia pa, “makigsulti ko sa atong editor. Hangyoon ko siya nga hatagan ako’g laing photographer.” -- Sumpayan pa