Ang awom ni George

Senior citizen na sa pagkakaron si George, apan puyra buyag, bilib ko ning akong amigo, kun babaye na ang hisgotan. Dugukon siya sa mga babaye, mabatan-on man, gulang o mabiyuda. Ilabi na gayod kadtong mga babaye nga makatilaw sa iyang romansa ug palamilami ibabaw sa kama, magpangita na kaniya. Aw, nuon, ang iyang palalab nga asawa, nga nahibawo na sa iyang pagkasiaw sa mga babaye, wa lang sab magreklamo, kay husto man ang data ni George sa pinansyal ug materyal nga panginahanglan sa pamilya, ilabi na sa sekswal nga ritwal nilang magtiayon.

Tungod kay hilabihan namo ka suod nga higala, ilabi na kay parehas kami niadto og trabaho sa wala pa kami moretiro, nga pulos mga inspector sa merkadong publiko sa siyudad sa Bogo, ubos sa pagmando sa among market administrator sa siyudad, nasakpan gyud nako ang talagsaong sekreto ni George sa iyang pagka-tsikboy ug ngano nga hilabihan niya ka dugokon sa mga babaye.

Tungod sa talagsaong awom sa iyang kargada! Sus, buhi nga awom nga anaa gyud magturok ug magtubo sa sima-sima sa sinaw nga tarak sa iyang kargada. Pun-an pa nga may gidak-on ug hustong gitas-on ang iyang buhi!

"Tungod ning maong awom, Bay Fred, sa pasakalye pa lang nako sa pag-esplikar og babaye, sugot dayon!" Labi na gyud kun makatilaw na sa hinansakay, sus, magpangita na nako ang mga babaye, uy!" nagpahiyom si George nga nagpawayway sa iyang kargada, dihang nagkadungan mi'g pangihi sa pansayan sa merkado-publiko sa siyudad sa Bogo. Mora na'g dyolin kabugol ang awom sa iyang kargada!

Karon, nga pulos na mi mga senior citizen ug parehas na nga retirado sa among pagpanarbaho sa kagamhanan sa siyudad sa Bogo ug managsilingan nga nagpuyo sa Nailon sa siyudad nga nagpadagan og five-six nga negosyo, mibilib gihapon ko sa pagka-tsikboy ni George.

Lalim ba nga daghan gihapong mga inday-hilay sa siyudad nga mga batan-on nga nagpangita kaniya, human makatilaw sa iyang romansa. Unya, daghan sab nga mga biyuda sa among barangay Nailon nga magsige og text kaniya, kay magpa-schedule og adlaw nga makigromansa kaniya.

Usa ka adlaw, nag-abot ming mga retirado sa pagpanarbaho sa city hall sa siyudad sa Bogo sa usa ka imnanan sa Nailon. Si George, si Cesar ug ako, nagkalingaw sa pagtagay og ilimnong beer grande.

"Kining awom sa akong kargada, maoy nagdala nako og suwerte sa akong kinabuhi! Payter gihapon ko hangtod karon sa mga babaye...!" mapagarbuhon si George nga nagkihatkihat namo ni Cesar.

Giyarok ni Cesar ang iyang tagay ug nagpanglingo nga nag-isa-isa sa iyang duha ka abaga nga maoy naandan na niyang panglihok matag adlaw. Maila nga nakadayeg si Cesar sa pagkatsikboy ni George, nga bisan sa among pangedaron, paspas gihapong mosiyapol sa mga babaye.

"Sus, nindot unta kun may awom pa kining akoa...!" ni Cesar nga nagpanglingo. "Unsaon, nagsugod na og pagkupos ang akoa," maoy hinungdan nga tiggamitan na lang ko og pilok ug kilay sa kanding....!"

Nahikatawa mi si George sa gikumpisal ni Cesar. Sa hilom, nangindahay sab ko nga unta nakabaton ko og talagsaong awom sa akong tarugo, aron dugukon og mga babaye, sama kang George. Apan sa laing bahin, nagpasalamat na lang sab ko nga napapas na kanako ang pagkatsikboy, ug mao nay gipukos ko karon ang pagsangyaw sa maayong balita sa GINOO.

Ug sa among panagsuod ni George, may naumol kong plano. Danihon ug agnihon ko ang suod kong amigo nga naghupot og talagsaong awom, sa pagsentro na sa Ginoo. (Kataposan)