Misyon sa kasingkasing

Gula 21

Kadiyot nga naghunahuna si Sandra. Nakalitan siya sa gisulti ni Bradley. Ingon sa nasurpresa siya sa gibalita sa ulitawo nga gikuyog niini si Debra sa balay aron sila magkahimamat.

Apan kalit lang ang iyang kahikugang. Misantop sa iyang hunahuna nga mao na kini ang higayon nga iyang gipaabot. Kay sukad nga iyang nasayran nga may girlfriend na si Bradley, gusto siyang makakita sa hinigugma niini. Out of curiousity lang ang iyaha.

“Timan-i baya,” ni Bradley pa dihang nagpaingon na sila sa sala. “Gipatuo nako si Debra nga manag-agaw ta.”

“Ayaw kabalaka,” matud ni Sandra. “Nasayod ko sa angay kong buhaton. Dili lagi ka mabuking.”

Sa nagsingabot na sila sa sala, nakita ni Sandra ang usa ka babaye nga naglingkod sa sopa. Misantop sa iyang hunahuna nga ang maong babaye mao si Debra. Wala pa niya maklaro ang panagway niini kay nagtakilid kini kanila. Ang atensiyon niini didto sa gitan-aw nga salida sa telebisyon.

“Sweetheart,” gisangpit ni Bradley ang babaye nga naglingkod sa sopa.

Nabatyagan ni Sandra nga mora’g nanlimbawot ang iyang mga balhibo pagkadungog sa maong pulong nga gilitok ni Bradley. Giingogan siyang namati. Pero wala siya masayod kun ngano.

Milingi ang babaye kanila. -- Sumpayan pa