Ang makililimos

Hapit na motikyop ang kagabhion. Daghan ang mga tawo nga nagngadto-nganhi sa dalan Colon. Dunay misulod-gawas sa mga mall. May nangaon sa Jollibee ug Goldilocks. May nagsulod-gawas sa Oriente nga sinehan. Malipayon ang mga tawo. May nagdali. Diha say hinay lang ang paglakaw.

Sa usa ka suok sa Colon, usa ka babayeng makililimos ang nagyaka sa abugong semento. Naghuwat nga dunay mohulog og sensilyo sa tayaong lata sa sardinas nga iyang gipatindog sa iyang atubangan.

"Limos intawon mo! Tagai ko ninyo’g limos!" Nagpakiluoy ang makililimos.

Dili pa tiguwang ang makililimos. Bisa’g bulingon ang iyang gisul-ob ug naglago ang hitsura, apan maaninaw nga batan-on pa siya. Nag-edad og bayinte singko.

Samtang nagpakilimos siya, mata’g karon ug unya motan-aw siya sa palibot. Mora’g wa siya sa hustong pangisip kay molingat lang ang iyang panan-aw.

"Gidili na man unta ang makililimos dinhi sa siyudad, pero nia gihapon sila. Naghatag lang og kahugaw sa dalan!"

"Bitaw. Dakpon gyud unta sila sa mga polis!"

Nadungog sa makililimos ang panagsulti sa duha ka seksi nga babaye nga milabay sa iyang nahimutangan. Nangyamiid kaniya. Igo lang mipahiyom ang makililimos.

"Pugson kun di mo molimos!" Nangyamiid sab ang makililimos. "Sus, mora’g kinsang mga limpiyong babaye. Nakaila ko ninyo, uy! Mga burikat mo sa Kamagayan!" Nagyawyaw ang makililimos.

Unya nagkagubot didto sa unahan. Milantaw ang makililimos ug iyang nakita ang duha ka mga ten-edyer nga nagdagan paingon sa iyang nahimutangan, nagbitbit ang usa kanila og shoulder bag. Samtang sa ilang luyo, nagpanawag og tabang ang usa ka tambok nga babaye. Nagtuo ang makililimos nga biktima kini sa pagpanglabni.

Paghitungod sa duha ka ten-edyer sa makililimos, gipatiran niya kini. Nalukapa ang duha ka batan-on. Nagdali sa pagbangon. Apan laing patid ug sumbag ang ilang nahiagoman gikan sa makililimos. Hangtod nga wala na makabangon ang mga esnatser. Nangabun-og sila. Batid sa karate ang makililimos.

Nangabot ang mga polis. Gidala ang duha ka esnatser sa police office.

Nahibulong ang mga tawo nga nagtan-aw sa makililimos labi na dihang misaludo kaniya ang mga polis sa wala pa manglakaw. Nagpahiyom ang makililimos ngadto sa mga tawo. Iyang gihubo ang bulingon niyang gisul-ob nga bestida.

Naniga ang mga mata sa mga tawo kay nagsul-ob diay og uniporme sa pagka-polis ang makililimos, gisapawan sa bulingon nga sinina ang iyang uniporme.

"Ako si SPO1 Carmelita Sadaya. Sukad karon, anhi na ko magbantay sa dalan Colon aron masanta ang mga badlungon dinhi. Ug kadtong akong nadakop mao ang mga lider sa mga esnatser ug mangunguot dinhi sa Colon."

Malipayon ang mga tawo. Ilang gipakpakan ug gipasalamatan si SPO1 Sadaya kay duna nay tigpanalipod kanila sa mga badlungon sa dalan Colon. (Kataposan)