Minatay mibangon kay gigutom

Kasayang sa panahon Pre Siyoy imbis gilutoan ko og kalderitas si Kumpare nimo Miyoy alang sa kasumaran sa iyang adlaw namatay na hinuon? Subsob kaayo ang binakhoan sa akong tingog nga mipadayag sa dili tiaw kong kasub-anan.

"Nagduda baya ako Kumare Nisya nga napasmo sa gutom si Kumpare Miyoy?" misamot kalisngag ang ilong sa akong kumpare nga namulong.

"Nganong nakaingon ka man niana Pre Siyoy nga pasmo ang sakit sa imong kumpare?" dihay sagol kalaghaw sa akong tingog nga nagpakisayod kang Kumpare Siyoy.

"Tungod kay sa panahon nga magkadungan kaming duha og pagpanawat matag sayo sa buntag sa among isig-kasanggotan ako mang hikit-an si Kumpare Miyoy nga magpunay og ping-it ang iyang nawong gumikan kuno sa kasakit sa iyang tiyan?" hupong sa kamatinud-anon ang tinubagan ni Kumpare Siyoy nga nalibkas sa iyang ngabil. Usahay makaingon ako sa akong kaugalingon nga insakto ang tanang gipamulong sa akong kumpare.

Unsaon imbis akong pahigopon og sabaw sa tinughong, unahon man hinuon niya ako sa pagdigamo bisan pa sa katugnaw sa kaadlawon.

Kinsa man tuod nga maayong laki nga bana nga sa dili pa moadto sa iyang sanggotan aron manawat ... makapuntos naman og duha ka rawon?

"Kanus-a man diay ilubong si anhing Kumpare Miyoy ... nga wa ra ba kaha kini balsamaha ... Kumare Nisya?" kalit lang nahagtos ang kahalawom nga bung-aw sa akong paghanduraw sa pangutana kanako ni Kumpare Siyoy.

"Ugma na lang tingali sa hapon Pre Siyoy," dihay kaluming sa akong tingog nga mitubag sa pangutana sa akong kumpare.

Dili ikalimod nga sulod na karon sa duha ka tuig sukad gikahiusa ang duha namo ka kasingkasing ni Miyoy ning kalig-on nga talikala sa kaminyoon... ning dakong simbahan sa lungsod sa San Fernando, wa gayod kami tugahi bisan usa na lang unta ka buok anak nga matawag namong liwat sa among panagtipon isip magtiayon.

Gani, ako pang mahinumdoman nga sa panahon kaslonon na kaming duha si Miyoy ingon sa manganaykanay pa sa akong kaisipan ang daw pagmahay ni Siyoy nga nagkanayon:

"Kay kun pagbuot gayod kini sa akong kapalaran Nisya nga dili ko maangkon ang imong gugma ... magtinawganay na lang unya kita og kumpare ug kumare diin ako nakahukom nga magpabilin nalang ulitawong guwang dinhi sa atong balangay sa Pitalo."

"Basin nalata na pag-ayo ang giluto kong kalderitas Pre Siyoy ... manulod una kita sa kusina?" dihay sagol kaparaygon sa akong tingog nga nangagda kang Kumpare Siyoy.

Ambot unsang hitaboa nga samtang giagbayan ako ni Kumpare Siyoy padulong og sulod sa among kusina diha may iyang nahikapan nga hilabihan gayod nga giloka.

"Preeeee Siyoyyyyyy kanunayaaa ogggg hikapppp kayyy hilabihannn mannn kalamiiii saaa kagilokkkk?" wa ko kapugngi ang pagsinggit.

"Kinsaaaaa mannnn anggg diliiii bationnnn ogggg kagilokkkk Kumareee Nisyaaa ngaaa angggg nagbungdoooo mannnn saaa .... imong dughannn angggg akongggg nahikapannnn?" nagkayuring ang tingog ni Kumpare Siyoy.

"Bonggggg .... bongggg!" takulahaw among nabatian ni Kumpare Siyoy ang kalanog sa tabon sa lungon ni anhing Miyoy nga natagak sa among sawog nga kawayan diin miguho sa pagbangon ang patay'ng lawas sa naanhing kong bana nga nagkanayon:

"Diliiiii gayoddddd maantossss anggg akongggg kagutommmm Nisyaaa uggg Kumpareee Siyoyyyy .... binliiii akooo bisannn sabawwww naaaa langgg saaa kalderitasss!" (Kataposan)