Misyon sa kasingkasing

Gula 16

Human sa paniudto, naligo si Sandra. Misugyot man gud si Bradley kaniya nga manuroy sila. Gusto siyang masuheto ug makasuhid sa kaanindot sa Sugbu mao nga gisanong niya ang paghagad sa ulitawo.

Paggawas niya sa banyo, mibanos pagsulod si Bradley aron usab maligo.

Midiretso siya sa iyang lawak ug nag-ilis. Maoy iyang gisul-ob ang blouse nga makita og diyotay ang cleavage sa iyang dughan nga giparisan niya og karsones. Namulbos siya sa iyang nawong ug gibutangan og nipis nga lipstick ang iyang mga ngabil atubangan sa salamin. Unya giareglar niya ang iyang buhok.

Migawas siya sa lawak human makailis. Pero nakugang siya pagkakita niya kang Bradley nga naglingkod sa sopa sa sala. Mitindog kini pagkakita kaniya.

“Ready kana diay?” Mora’g dili makatuo si Sandra.

“Oo,” maoy tubag. “Ngano man diay?”

“Dali ra man gud ka kaayong nakailis. Mao pa gani pagsulod nimo sa banyo kaganina sa dayon na nakong sulod sa kuwarto aron mag-ilis, pero naunhan pa man gihapon ko nimo.”

“Kadali ra man gyud kun mag-ilis kaming mga lalaki.”

“Polis ka gyud og linihokan. Abtik. Kadali rang maka-accomplish og trabaho.”

Igo lang mipahiyom si Bradley sa iyang gisulti.

Nanggawas sila sa balay. Naatol sab nga dihay taxi nga nagsingabot. Gipara kini ni Bradley ug nagpahatod sila ngadto sa Ayala. -- Sumpayan pa