Misyon sa kasingkasing

Gula 11

Duol ra ang distansiya nila ni Sandra ug Bradley sa usa’g-usa mao nga maduloton gayod ang ilang pagtinutokay. Dihay lahing kakulba nga mibangon sa dughan ni Sandra niadtong maong panagsugat sa ilang mga tinan-awan.

Gosh! Guwapo gyud kaayo kining lalakiha, hunghong niya sa kaugalingon. Perfect ang iyang mga mata ug ngabil. He’s a hunk!

Gibati ni Sandra ang diyotay’ng kauwaw sa dihang iyang namatikdan ang amused nga pahiyom nga miaslay sa ngabil ni Bradley.

“S-sige,” ni Bradley pa. “Biyaan ko na ikaw aron ka makapahuway. Nasayod kong gikapoy ka sa biyahe ilabi na nga kuwang kita sa katulog kagabii sa barko.”

“Okey lang,” ni Sandra pa. “Nalingaw man sab ko sa atong panagkabildo.”

“Kun unsay imong gikinahanglan dinhi, ayaw kaikog sa pagsulti namo.”

“Salamat.”

Gisundan niya’g tan-aw si Bradley sa dihang migawas na kini sa lawak.

Dihang nag-inusara na lang siya sa lawak, gi-lock niya ang pultahan niini. Gihukas niya ang gisul-ob niyang sinina. Nag-ilis siya’g sinina nga pangbalay. Unya mihigda sa ibabaw sa katre. -- Sumpayan pa