Gikasilagan ko ang kalibotan

Gula 16

“Unsay buot mong ipasabot?”

“Kun basura pa kana, dili kinahanglang anha gayod kana ilabay sa tago nga dapit.”

Nahitan-aw si Ethan kang Sonia.

“Duolon, nato,” awhag ni Sonia sa ulitawo.

Ug miuna siya paglakaw paingon ngadto sa nahimutangan sa itom nga plastik. Si Ethan misunod kaniya nga walay tingogtingog.

Sa dihang nagkaduol na sila, ilang namatikdan ang pagpanglupad sa mga langaw. Unya misugat kanila ang isog kaayong baho. Nakapanap-ong si Sonia sa iyang ilong.

Pero mipadayon gayod siya sa pagduol sa nahimutangan sa plastik nga itom. Nasuta niya nga kini ang gidugok sa mga langaw. Mialibwag ang daghang langaw sa dihang nahiduol na sila si Sonia ug Ethan sa nahimutangan sa plastik nga itom.

“Unsa man kaha kana?” Pangutana ni Ethan samtang nanap-ong sa iyang ilong.

Wala tubaga ni Sonia ang pangutana ni Ethan. Mikuha hinuon siya’g gamay nga sanga sa kahoy ug iyang gituhiltuhil sa tumoy niini ang plastik bag. May lahi nga pangagpas nga misapigad sa iyang hunahuna.

Sa inantigong paagi, gibadbad ni Sonia ang gihigot nga pisi sa baba sa plastic bag ginamit ang sanga sa kahoy nga iyang gigunitan. Dangtan og pipila ka gutlo, nabadbad gayod ang higot sa baba sa plastic bag.

Ug misiga ang mga mata ni Sonia sa iyang nakita. -- Sumpayan pa