Gula 15
Tuod, nakita niya ang maong dapit. Didto ra diay kini sa ubos nga bahin dili layo sa ilang nahimutangan.
“Didtong dapita,” giingnan ni Sonia si Ethan.
Mipaspas siya paglakaw paingon sa maong dapit. Misunod kaniya si Ethan nga nagdala sa kamera niini.
Pag-abot nila sa nahawan nga dapit nga gibuldos, mianinaw sila sa palibot. Pero wala siya’y nakita nga bisan unsang butang nga natingad-an nga makadapit sa pagtagad.
“Wa man lagi,” ni Ethan pa.
Wala motingog si Sonia. Milakaw siya paingon sa unahan, sa may nag-ungki nga dakong bato. Misunod kaniya si Ethan.
Pero wala gihapon sila’y nakita nga nakadapit sa ilang pagtagad.
Daw gibatig kahisagmuyo si Ethan milakaw na balik sa nahimutangan sa ilang gisakyan.
“Ayaw una Ethan,” matud ni Sonia dihang may nasigpatan siya didto sa may ubos nga bahin duol sa punoan sa dakong kahoy.
“Ngano man?” Milingi si Ethan kaniya.
“Tan-awa, o,” gitudlo ni Sonia ang iyang nakita ngadto kang Ethan.
“Kanang itom nga plastic?” Mora’g walay interes si Ethan sa nakita ni Sonia.
“Oo. Unsa kahay sulod nianang maong plastic bag?”
“Pastilan, pagkademalas ba diay niining atong lakaw. Nag-usik-usik lang kita’g panahon tungod nianang usa ka itom nga plastik nga gisudlan og basura.”
“Nganong dili man nato sutaon kun basura ba gayod ang sulod niana?” -- Sumpayan pa