Misyon sa kasingkasing

Gula 8

Niadtong gabhiona, samtang nagpadayon paglawig ang barko nga ilang gisakyan sa kadagatan paingon sa Sugbu, daghang mga butang ang gipanagsultihan nila ni Sandra ug Bradley.

Kadali ra gyud silang nagkasuod. Daghan nang mga butang bahin sa kinabuhi ni Sandra nga iyang gikatug-an ngadto kang Bradley. Hinuon, dili gayod ang tanan. May mga pribadong butang sa iyang kinabuhi nga dili niya ikatug-an ngadto ni bisan kinsa.

Daghan na usab og gitug-an si Bradley kaniya mahitungod sa mga butang sa kinabuhi niini. Mibati siya’g diyotay’ng kasubo pagkasayod nga may hinigugma na si Bradley. Wala siya makasabot sa iyang kaugalingon. Nasayod siya nga wala siya’y katungod nga magselos apan ingon sa mao kini ang iyang gibati.

“Dili kaha masuko ang imong girlfriend kun mopuyo ko sa inyo?” Gisukna niya si Bradley.

“Dili kana mahitabo,” pasalig ni Bradley. “Buotan ug masinaboton si Debra.”

“Debra diay ang iyang ngalan?”

“Oo, Debra Belloliso ang tinuod niyang ngalan.”

Nahilom si Sandra. Karon pa lang, iya nang gibati ang kahinam nga mahimamat ang maong babaye. Wala siya masayod kun unsay hinungdan sa mao niyang curiousity. Basta kay gusto siyang makakita sa girlfriend ni Bradley.

“Aron dili mahibulong ang mga tawo,” ni Bradley pa, “atong ipatuo nila nga manag-agaw ta.”

“Unsa?” Nakalitan si Sandra sa gipadayag nga hunahuna ni Bradley.

“Mao kana. Ipaila tikaw nga pag-umangkon ni Mama Diday.”--Sumpayan pa