Misyon sa kasingkasing

Gula 7

Namatikdan niya nga naghinuktok si Bradley. Sa iyang pangagpas, gitimbangtimbag niini ang iyang gihangyo.

“M-mahimo ba, Bradley?” Misukna si Sandra pagkilab sa pipila ka daklit.

Tininuod na ang iyang paghangyo. Ingon gani sa dili siya makatuo sa iyang kaugalingon kun nganong misalig gilayon siya sa lalaki nga karon pa niya mahimamat. Ang iya rang nasabtan mao nga gaan kaayo ang iyang kabubut-on ngadto sa lalaki.

“Nga-nganong dili?” May pahiyom nga migitli sa mga ngabil ni Bradley.

“Wa kay angay kabalak-an mahitungod niana. Kami rang duha ni Mama Diday ang nagpuyo sa among balay.”

“Salamat,” nakaingon siya.

Hilom siyang nahinangop. May lain na usab siyang nadiskubrehan mahitungod sa pagkatawo ni Bradley. Sa gisulti niini kaniya, iyang nadiskubrehan nga wala pa kini kabilinggan sa kinabuhi. Ulitawo pa diay si Bradley.

Nakapasalamat siya sa Dios nga wala gayod siya pasagdi. Niining iyang pag-adto karon sa Cebu, wala siya’y klarong direksiyon. Hinanali man gud ang iyang hukom sa pagbiya sa Davao.

Tinuod nga may higala siya sa Sugbu, si Ruth, klasmet niya kaniadto sa nagtungha pa siya sa Davao. Ang problema lang kay nawagtang kaniya ang contact number ni Ruth.

Maayo gani kay gikahimamat niya si Bradley ug may kadangpan na gayod siya didto sa Sugbu. -- Sumpayan pa