Gula 4
“Si Rafael Castro, ang akong uyoan. Maguwang siya sa akong inahan. Naminyo siya sa Cagayan de Oro. Pero patay na lagi siya.”
“Unsay iyang namatyan?”
“Gipatay siya. Gipusil sa wala mailhing mga tawo.”
“U-unsa?”
Naputol sa makadiyot ang ilang panagsulti sa dihang may crew sa barko nga miduol kanila aron pag-inspeksiyon sa ilang mga ticket. Dihang nakabiya na ang crew, gipadayon nila ang panagkulukabildo.
“Nganong gipatay man ang imong uyoan sa wala mailhing mga mamumuno?” Nangutana si Sandra. “May atraso ba siya niadtong mga tawhana?”
“Mao kanay buot sutaon sa kapolisan sa Cagayan de Oro,” nagkanayon si Bradley. “Naglisod sila sa pagpagawas og teyoriya tungod kay wala man sila’y matumbok nga suspek. Ang nahibaw-an lang sa kapolisan sa CDO mao nga sakop ang akong uyoan sa Molimoli Gang.”
“Molimoli Gang?”
“Yes, usa ka bigtime syndicate nga na-involved sa gun smuggling nga naglihok sa Kabisay-an ug Mindanao.”
“Nakadungog na ko nianang maong grupo. Aktibo sab nang naglihok didto sa Davao.”
“Diay ba?”
“Oo. Baniog kaayo ang maong grupo didto sa Davao City.”
“Dili ba crime buster man ang inyong mayor sa Davao?”
“Tinuod kana. Pero malutsan gihapon siya sa mga sakop sa Molimoli.” -- Sumpayan pa