Nagtakoban nga pagbati

Gula 89

“I’m sorry, sweetheart. Ang tinuod, pagpakaaron-ingon lang kadtong ako aron pagtago sa nagtakoban kong pagbati. Gihimo ko kadto tungod kay dili ko makadawat nga mahigugma lang sa usa ka babayeng kabos nga sama kanimo. Nahadlok ko nga tingali mahisama ka kang Jinky nga gusto lang mopahimulos sa among kadato. Apan nasuta ko sa kapulihay nga lahi ka kaniya.”

“Bisan pobre ko apan wa ko mangandoy nga manghantok sa mga dato.”

“Nasayod ko. Ug kanay nakapasamot sa akong paghigugma kanimo. Loving you is a challenge.”

Subling giukoban ni James ang iyang mga ngabil. Mipusnga siya paglunga sa hangol kaayong halok sa ulitawo.

“I love you, Denia.”

“I love you, too, James.”

“Mosugot ka na bang magpakasal ta?”

“Unsa pay akong mahimo? Nakuha na nimo ang tanan mong gusto nako?”

Mikatawa si James sa iyang gisulti. Unya gigakos siya niini. Samtang ang ilang mga ngabil nag-akob sa pinadulot nga hinagkanay.

Gipahigayon ang kasal nila ni Denia ug James sa Cebu Metropolitan Cathedral tinambongan sa iyang mga ginikanan, sa mga ginikanan sa lalaki, mga paryente ug ubang mga dinapit. Alegre ang ilang kasal.

“You may now kiss the bride,” giingnan sa pari si James human sa seremonyas.

Kalit lang gibaswat ni James si Denia. Gikugos siya niini unya giukoban ang iyang mga ngabil sa halok nga puno sa paghigugma. Mihugyaw ang tanan nga nakasaksi sa maong talan-awon. -- Kataposan