Ang bestfriend kong ambisyosa

Gilaayan ko sa gipuy-an kong boarding house. Domingo karon, way trabaho. Nag-opisina ko sa usa ka advertising agency sa siyudad. Every weekend kong mopauli sa among lungsod sa Carcar. Apan karon, wa ko mopauli kay nag-overtime ko kagahapon.

Alas dose na sa udto. Nakahunahuna ko nga sa Chowking sa Fuente ko mokaon. Sa Urgelio ko nagpuyo. Usa ka apartment nga nanawat og boarders ang akong gisak-an.

Hapit na ko makahuman sa pagkaon sa Chowking dihang may misulod nga usa ka babaye nga giagbayan sa usa ka hamtong nga lalaki. Gitutokan ko ang babaye. Di gyod ko mahimong masayop. Si Mercy gyud, ang akong best friend sa nagtungha pa ko sa college.

Nakahuman sab sa college si Mercy, parehas nako. Nakakita si Mercy nako. Giwara-warahan ko siya sa kamot. Mibalos sab siya sa pagwara-wara. Nagdali siyang miduol nako ug ang lalaki nga iyang kauban.

Mitindog ko. Nagbeso-beso kami si Mercy. Pulos kami malipayon sa among panagkita. Lima ka tuig na ang milabay sukad sa among paggradwar sa college ug karon pa kami nagkita pag-usab.

"Komosta ka na?"

Nindot kaayo’g pahiyom si Mercy. Misamot siya kaguwapa. Hamis kaayo’g kutis. Angayan siya sa iyang buhok nga boy cut.

"Dalaga gihapon, uy! Ikaw?" Mitan-aw ko sa kaubang lalaki ni Mercy. Guwapo kini ug husto sa barog. Hitsurang adunahan. Nagpahiyom siya nako.

"Nia, minyo na. Tuod diay, akong bana, si Mark."

Naglamanohay kami si Mark. Nabatyagan nako nga walay kubal ang iyang palad. Adunahan gyod siya, matud ko sa hilom. Natuman gyod ang pangandoy sa akong best friend. Nanumpa si Mercy kaniadto sa nagtungha pa kami nga di gyod siya makigrelasyon og lalaki nga pobre, maoy gusto niya nga adunahan gyod kini aron palitan siya’g kotse.

"Sige, Mercy, pangaon na mo. Hapit na sab ko makahuman." Gikidhatan ko ang akong bestfriend.

"Sige. Adto lang kami sa laing lamesa."

Gisundan ko sa akong panan-aw si Mercy ug si Mark. Malipayon kaayo ang akong suod nga amiga. Kinsay dili magmalipayon? Adunahan ang iyang nabana bisag maguwang kini kaniya og edad.

Milingkod ko pagbalik og mipadayon sa pagkaon. Apan wa madugay, nadungog nako ang kusog ug isog nga tingog sa usa ka babaye. Mitan-aw ko sa gigikanan sa tingog. Maoy akong nakita ang tambok nga babaye, hapit mapuno ang lawas sa mga alahas ug nagsul-ob og bestida nga mahalon, nga nanighawak nga nagtindog ug nag-atubang kang Mercy.

"Mangingilog og bana. Wa kay uwaw bayhana!"

Nadiyong ang akong mga mata sa akong nadungog. Gitulisok sa babaye si Mercy. Wa magtingog ang akong best friend. Nagduko lang. Siya lang ang gitan-aw sa mga kustomer sa Chowking.

Gibitad ni Mark ang babaye paingon sa gawas sa kan-anan. Nagtagawtaw ang tambok nga babaye. Dihang nakagawas na ang duha, gitan-aw ko si Mercy. Mitan-aw sab siya nako apan kadali lang. Miduko dayon siya. Wala makahimo pagtan-aw nako og dugay.

Naluoy ako sa akong best friend. Mitindog ko ug giduol ko siya aron alam-alaman. Naghilak na ang akong best friend. Nasayod na ko kun kinsa si Mark sa iyang kinabuhi. (Kataposan)