Gula 86
“Denia, ablihi kining pultahan,” sangpit ni James kaniya didto sa gawas. “Magsulti ta.”
“Dili, James,” ni Denia pa nga misandig sa palid sa pultahan. “Palayo kanako, utang buot. Palayo kanako.”
“Dili ko mobiya dinhi kun dili ko ikaw madala balik ngadto sa Cebu.”
“Nag-usik ka lang sa imong panahon. Dili ko mokuyog nimo.”
“Ablihi kining pultahan kay magsulti ta. Daghan kita’g angay panagsultihan.”
Wala mokihol si Denia. Nagpabilin siyang nagsandig sa palid sa pultahan.
“Kun dili mo kini ablihan,” ni James pa. “Mapugos ko sa pagguba niining pultahana.”
Gikuyawan si Denia. Wala siya masayod kun unsay angay niyang buhaton.
Nakugang si Denia sa dihang gidasmagan ni James ang palid sa pultahan didto sa gawas. Maayo gani kay lig-on ang trangka niini ug wala dayon maabli.
“Denia, unsa ba?” Gikan ni James didto sa gawas.
Nasuta ni Denia nga wala magtiaw si James. Gub-on gayod niini ang pultahan kun dili niya ablihan. Maong napugos siya sa pag-abli niini.
Misulod dayon si James.
“Nganong mianhi ka pa man gyud?” Sukit ni Denia nga kahilakon. -- Sumpayan pa