Gula 85
“Daghang salamat na lang sa inyong offer, Sir, Ma’am,” ni Denia pa. “Pero sama sa ako nang gikaingon, di ko makadawat sa inyong offer. Kamo nay maantigong mopasabot kang James sa tanan. Ingna siya nga di angay mabalaka nako. Ug balikon ko, wa siya’y tulobagon sa nahitabo kanamo.”
Sa nakita nga walay kahimoan ang ilang tuyo, nanamilit na ang magtiayong Ricarte kang Denia.
Milabay ang usa ka semana...
Usa niana ka udto, misulod si Denia sa iyang kuwarto aron mopahuway. Gikapoy siya tungod kay sayo siyang nanglaba sa tubod. Daghan siya’g mga labhonon mao nga dugay siyang nakahuman. Dili pa gani siya dugay nga nahiuli gikan sa tubod diin siya nanglaba.
Mao nga human makapaniudto, nakahukom si Denia nga mopahuway sulod sa iyang kuwarto. Mihigda siya sa lantay samtang namati sa matahom nga mga awit nga gipalanog sa FM station.
Wala madugay dihay nanuktok didto sa gawas sa pultahan sa balay. Migawas siya sa kuwarto ug giablihan ang pultahan. Nakugang siya sa iyang nakita.
Maoy mitagbo sa mga mata ni Denia ang bayhon ni James nga nagtindog sa gawas sa pultahan. Mibathay ang pahiyom sa mga ngabil niini sa pagkakita kaniya.
Apan si Denia nakalitan ug natarantar. Wala siya magdahom nga motungha si James niining higayona. Kalit niyang gibalik pagsera ang palid sa pultahan sa dihang mihana na ang ulitawo sa pagsulod. -- Sumpayan pa